मनाङ, असोज १५ गते ।

 मनाङको नार्पाभूमि गाउँपालिकास्थित हिमलुङ हिमालको आधार शिविरमा गएको हिमपहिरोमा पुरिएर सम्पर्कविहीन भएका १६ जनामध्ये १५ जनाको शव फेला परेको छ ।

उद्धार टोलीले बिहीबार थप आठ जनाको शव निकालेसँगै अब एक जनाको मात्रै शव भेटिन बाँकी रहेको हो ।

नेपाल नेशनल माउन्टेन गाइड एसोसिएसन (एनएनएमजीए) को विशेषज्ञ खोज तथा उद्धार टोलीले कठिन परिस्थितिका बिच बिहीबार आधार शिविर क्षेत्रबाट आठ वटा शव फेला पारेको हो ।

बिहीबार भेटिएका शवमध्ये छ वटा फु गाउँमा र दुई वटा सदरमुकाम चामेमा हेलिकोप्टरमार्फत ल्याइएको मनाङका सहायक प्रमुख जिल्ला अधिकारी कृष्णप्रसाद पौडेलले जानकारी दिनुभयो । उहाँका अनुसार ल्याइएका शवहरूको आवश्यक कानुनी प्रक्रिया पूरा गर्ने काम भइरहेको छ ।

अझै पनि सम्पर्कविहीन रहेका अन्तिम एक जना हिमालयन होलिडेजका सदस्य हुन् ।

प्रतिकूल मौसम र जटिल भौगोलिक अवस्थाका बिच अन्तर्राष्ट्रिय पर्वतीय महासंघ (आईएफएमजीए)का माउन्टेन गाइड पासाङ काजी शेर्पा र विक्रम कार्कीको नेतृत्वमा खटिएको टोलीले बाँकी एक जनाको खोजी कार्यलाई तीव्र बनाएको छ ।

यसअघि उद्धार टोलीले आइतबार संखुवासभाका छेवी भोटे र पासाङ भोटे, सोमबार गोरखाका वीरेन्द्र गुरुङ र खोटाङका घनश्याम राई तथा बुधबार गोरखाका आश गुरुङ, खोटाङका सुरज राई र रुकुमका कलम बुढाको शव फेला पारेको थियो ।

गत असोज १० गते शनिबार राति हिमलुङ आधार शिविरमा अचानक गएको हिमपहिरोमा परी आरोहण टोलीका सदस्य तथा स्थानीय सहयोगी गरी १६ जना पुरिएर बेपत्ता भएका थिए ।