नेपालगन्ज, माघ १४ गते ।

थारु कल्याणकारिणी सभा (थाकस) बढैयाताल बर्दियाले आयोजना गर्ने थारु साँस्कृतिक कृषि, पर्यटन तथा माघ महोत्सव २०८१ को तयारी पूरा भएको छ ।

‘राष्ट्रिय एकता ओ बिबिधता हमार शान, थारु भाषा, साहित्य, कला, सँस्कृति बचैना हमार अभियान’ मूल नारासाथ पहिलो पटक आयोजना हुन लागेको महोत्सव माघ १५ गतेबाट सुरु गरिने र महोत्सवको सबै तयारी पूरा भएको महोत्सव मूल समितिका संयोजक शंकरप्रसाद थारुले बताउनुभयो ।

संघीय सरकारका संस्कृति पर्यटन तथा नागरिक उड्डयन राज्यमन्त्री अरुणकुमार चौधरीले महोत्सवको उदघाटन गर्ने कार्यक्रम तय भएको जनाउँदै उहाँले थारु भाषा, साहित्य, कला, सँस्कृतिको संरक्षण र सम्बर्धन गर्ने उद्देश्यले महोत्सव आयोजना गरिएको बताउनुभयो ।

माघ २५ गतेसम्म चल्ने महोत्सवमा थारु भाषा, संस्कृति, संरक्षणका लागि झाँकी, थारु रैथाने परिकार र खानपिन सिन्की, चट्नी, ढिक्री, अनदी चामलको जाँड, अन्दीक बरिया, घोँघीका परिकार, गँगटा, मुसालगायतका परिकार, थारु जातीले बनाउने दारुको ब्राण्डिङमा सहयोग गर्नेखालका प्रदर्शनी गरिने जनाइएको छ ।

महोत्सवमा थारु जातिको जन्मदेखि मृत्युसम्मको संस्कार संस्कृति झल्किने थारु संग्रहालय प्रदर्शनी तथा अवलोकन गर्न सकिने थारु संग्रहालय व्यवस्थापन समितिका संयोजक बिमल चौधरीले बताउनुभयो ।

उहाँले महोत्सवमा थारु समुदायमा लोप भइरहेका थारु पौराणिक नाच, गीत प्रतियोगिता समेत आयोजना गरिएको बताउनुभयो । पौराणिक नाच, गीत प्रतियोगिताका लागि गाउँबाट झाँकी दर्ता भइरहेको झाँकी व्यस्थापन समितिका संयोजक कमलेस थारुले जनाउनुभयो ।

महोत्सवमा थारु समुदायको गोबरमा बीउ राख्ने, परालमा आलुको बीउ राख्ने परम्परागत तरिका, माटोभित्र बेसार, भन्टा सुुकाएर बीउ निकाल्ने परम्परागत बिधि, थारु आलुको बीउ पनि प्रदर्शनी गरिनेछ ।

पराम्परागत रुपमा आलु मुला, लौका, भान्टा, फर्सी, खुर्सानी, बेसार, गहँु बिउ भण्डारण गर्ने बिधिबारे प्रदर्शनीमार्पmत जानकारी गराइने मूल समितिका संयोजक थारुले बताउनुभयो । गाउँ गाउँबाट थारु बाल कलाकारहरु खोज्नका लागि थारु डान्स आइडल प्रतियोगिता पनि आयोजना गरिएको आयोजकको भनाइ छ ।

वर्दियाको प्रमुख चिनारीको रुपमा रहेको बढैयातालको प्रचार प्रसार गर्ने तथा प्राकृतिक बहुमुल्य जडीबुटी (गेजरा, सेल्की, भँसेर, कमालको फल (कलगट्टा) करमुवा सागको पहिचान गरी व्यावसायिक बनाउने उद्देश्य राखिएको छ ।

महोत्सवमा कला र संस्कृति झल्काउने हुर्दङ्वा नाच, मघौटा नाच, सखिया नाच, झर्रा नाच, बर्का नाच लगायत अन्य स्थानीय समुदायको कौरा, सोरठी लगायतका पौराणिक नाचको प्रस्तुति रहने आयोजकले जनाएको छ ।