काठमाडौँ, भदौ २८ गते ।

 नेपाली सेनाका प्रधानसेनापति महारथी अशोकराज सिग्देल मित्रराष्ट्र जनवादी गणतन्त्र चीनको औपचारिक भ्रमणका लागि आइतबार बेइजिङतर्फ प्रस्थान गर्नुभएको छ ।

चीनको निमन्त्रणामा यही भदौ २८ गतेदेखि असोज ३ गतेसम्म हुने औपचारिक भ्रमणका क्रममा प्रधानसेनापति सिग्देल बेइजिङमा आयोजना हुने तेह्रौं बेइजिङ सियाङशान मञ्चमा समेत सहभागी हुनुहुने कार्यक्रम रहेको नेपाली सेना, जनसम्पर्क तथा सूचना निर्देशनालय,जङ्गी अड्डाले जनाएको छ । बेइजिङ प्रस्थान गर्नुअघि त्रिभुवन अन्तर्राष्ट्रिय विमानस्थलमा बलाधिकृत रथी प्रदीपजङ्ग केसीले प्रधानसेनापति सिग्देललाई बिदाइ गर्नुभएको थियो। भ्रमणअघि जङ्गी अड्डामा नेपाली सेनाको एक टुकडीले उहाँलाई सम्मान गारत अर्पण गरेको थियो ।

प्रधानसेनापतिको अनुपस्थितिमा बलाधिकृत रथी प्रदीप जङ्ग केसीले कायममुकायम प्रधानसेनापतिको कार्यभार सम्हाल्नुहुने नेपाली सेनाले जानकारी दिएको छ । यस भ्रमणले नेपाल र चीनबीचको आपसी सैनिक सम्बन्ध विस्तार भई सैनिक कूटनीतिमार्फत नेपालको परराष्ट्र नीतिलाई समेत सकारात्मक योगदान पुग्ने विश्वास नेपाली सेनाले लिएको छ ।