तुलसीपुर, माघ १३ गते ।

तुलसीपुरमा रहेको एनएमबी बैङ्कको शाखामा चोरी गर्न  गएका एक व्यक्तिलाई प्रहरीले पक्राउ गरेको छ। आइतबार  बिहान दुई बजेतिर  तुलसीपुर उपमहानगरपालिका वडा नम्बर ५ क लाइनमा रहेको बैङ्कमा चोरी भइरहेको सूचना पाएपछि प्रहरी पुगेको थियो ।

इलाका प्रहरी कार्यालय  प्रहरी प्रवक्ता प्रहरी निरीक्षक विनोदराज खत्रीको नेतृत्वमा पुगेको टोलीले उनलाई पक्राउ गरेको हो । प्रहरीका अनुसार तुलसीपुर १८ दुधरास का २७ वर्षका सन्तोष चौधरी बैङ्कको च्यानल गेटको ताला तोडेर भित्र प्रवेश गरेकै अवस्थामा पक्राउ गरिएको हो । सोही क्रममा उनलाई प्रहरी निरीक्षक खत्रीको नेतृत्वमा खटिएको टोलीले नियन्त्रणमा लिएको हो ।

चौधरीको साथबाट हतौडा, छिना, प्लास, ह्याक्सा ब्लेड लगायतका  चोरी गर्न प्रयोग भएका सामग्रीहरू बरामद गरिएको छ। साथै निज चौधरी  सवार रा ५ प ९७९ नम्बरको स्कुटर समेत प्रहरीले नियन्त्रणमा लिएको छ ।  घटनाबारे थप अनुसन्धान भइरहेको प्रहरीले जनाएको छ ।