बागलुङ (गलकोट), साउन ९ गते ।

 राष्ट्रिय स्वतन्त्र पार्टी (रास्वपा) बागलुङको प्रथम जिल्ला अधिवेशन यही साउन १६ गते हुने भएको छ । केन्द्रीय निर्वाचन आयोगले यसअघि बागलुङ जिल्ला अधिवेशनबाट गठन गरिएको जिल्ला कार्यसमिति बदर गर्दै पुनः अधिवेशन गराउने निर्णय गरेपछि नयाँ अधिवेशन आयोजना गर्न लागिएको रास्वपा नेता पुनम शर्माले जानकारी दिनुभयो ।

केन्द्रीय निर्वाचन आयोगले बागलुङ जिल्ला अधिवेशन सञ्चालन प्रक्रियासम्बन्धी प्राप्त उजुरी, उपलब्ध तथ्य तथा प्रमाण र सम्बन्धित पक्षबाट प्राप्त स्पष्टीकरणको अध्ययनपछि अधिवेशन पार्टीको जिल्ला अधिवेशन कार्यविधिअनुसार सञ्चालन नभएको निष्कर्ष निकालेको थियो । सोही आधारमा पुनः अधिवेशन गर्ने निर्णय गरिएको हो ।

आयोगले बागलुङ जिल्ला अधिवेशनबाट गठन भएको भनिएको जिल्ला कार्यसमिति पूर्ण रूपमा बदर गर्ने निर्णय साउन ४ गते गरेको थियो । आयोगका प्रमुख भुवन केसीका अनुसार नयाँ जिल्ला अधिवेशनको मिति, समय, स्थान र निर्वाचन समिति गठनसम्बन्धी निर्णय सात दिनभित्र सार्वजनिक गर्न निर्देशन दिइएको थियो ।

यसअघि २०८३ जेठ २३ गते गलकोटमा सम्पन्न प्रथम जिल्ला अधिवेशनबाट पुनमप्रसाद शर्माको नेतृत्वमा जिल्ला कार्यसमिति घोषणा गरिएको थियो । त्यसपछि अध्यक्षका अर्का आकांक्षी ढालेन्द्र रायमाझी पक्षले अधिवेशनस्थलमै विरोध जनाएको थियो ।

अधिवेशन प्रक्रियाबारे केन्द्रमा उजुरी परेपछि बागलुङको अधिवेशन स्थगन सूचीमा परेको थियो । आयोगको निर्णयपछि अब पुनः बागलुङ बजारमा जिल्ला अधिवेशन आयोजना गरिने रास्वपाले जनाएको छ ।