काठमाडौँ, भदौ २९ गते ।

लोकप्रिय नाट्य संस्था ‘शैली थिएटर’ले १८ सेप्टेम्बर २०२६ देखि दुई विशेष नाटक मञ्चनको तयारी गरिरहेको छ। रसियन हाउस’को साझेदार संस्थाका रूपमा समेत काम गर्दै आएको सो संस्थाले १८ सेप्टेम्बरदेखि एन्टोन चेखोभको लोकप्रिय एकांकी नाटक ‘द स्वान सङ’को नेपाली रूपान्तरण ‘अन्तिम गीत’ प्रस्तुत गर्नेछ। त्यसैगरी, २३ सेप्टेम्बरदेखि महेश पौड्यालको मौलिक नेपाली नाटक ‘भावमल्ली’ मञ्चन गरिनेछ । दुवै नाटकको निर्देशन नवराज बुढाथोकीले गरेका हुन्। नाटक काठमाडौँको कमलपोखरीस्थित रसियन हाउसको प्रेक्षालयमा मञ्चन हुनेछन्।

शैली थिएटरका अनुसार ‘अन्तिम गीत’मा वरिष्ठ कलाकार तथा अभिनय गुरु (आरोहण गुरुकुलका संस्थापक) सुनील पोखरेल र अभिनेत्री सब्बु गुरुङको अभिनय रहनेछ। यसमा उत्सव बुढाथोकीले संगीत संयोजन गर्नेछन्। नाटकमा समावेश गीतहरू स्वयं पौड्यालले नै लेखेका हुन्।

‘भावमल्ली’मा शैली थिएटरका कलाकार आकाश भुजेल जैसीसहित अन्य कलाकारको अभिनय रहनेछ। यसको संगीतमा पद्मकन्या बहुमुखी क्याम्पसको संगीत विभागका कलाकार तथा प्रशिक्षकको योगदान रहनेछ।

रुसको बोल्शोई थिएटरको २५०औँ वार्षिकोत्सव तथा नेपाल र रुसबीचको द्विपक्षीय सम्बन्ध स्थापनाको ७०औँ वार्षिकोत्सवको अवसरमा शैली थिएटर र रसियन हाउसको संयुक्त आयोजनामा हुने ‘नेपाल–रुस थिएटर सप्ताह’ अन्तर्गत यी नाटकहरू मञ्चन गर्न लागिएको निर्देशक बुढाथोकीले बताउनुभयो ।

‘आरोहण गुरुकूल, काठमाडौँ’का नियमित नाटक मञ्चन बन्द भएपछि वरिष्ठ कलाकार सुनील पोखरेलको रंगमञ्चमा  पुनरागमनका रूपमा पनि यस अवसरलाई हेरिएको छ। निर्देशक बुढाथोकीले पोखरेलजस्ता उचाइका कलाकारलाई निष्क्रिय रहन दिन नहुने बताउँदै यस प्रस्तुतिमार्फत उनलाई पुनः रंगमञ्चमा ल्याउन पाउँदा आफू निकै उत्साहित भएको उल्लेख गर्नुभयो ।

“उहाँजस्तो कलाकारलाई निष्क्रिय रहन दिनु हुँदैन। म उहाँसँग लगत्तै अर्को नाटक गर्नेबारे पनि सोचिरहेको छु। उहाँसँग केही चलचित्र बनाउने योजना पनि छ’’, बुढाथोकीले भन्नुभयो ।

पोखरेलले यसअघि एन्टोन चेखोभलाई आफ्ना प्रिय नाटककारहरूमध्ये एकका रूपमा बताउँदै आउनुभएको छ ।  ’द स्वान सङ’ दशकौँसम्म रङ्गमञ्चमा सक्रिय रहेका एक वृद्ध कलाकारको कथा भएकाले, निर्देशकको बुझाइमा यो पात्र पोखरेलको आफ्नै जीवन र पेसागत यात्रासँग नजिकबाट मेल खान्छ; यसले उनको अभिनयलाई विशेष रूपमा जीवन्त र यथार्थपरक बनाउनेछ ।

असोज २ गते (अक्टोबर २) दिउँसो ४ बजे अन्तिम गीत’को मञ्चनसँगै यस महोत्सवको औपचारिक सुरुवात हुनेछ । ’शैली थिएटर’ का अनुसार, त्यसपछि असोज १९ देखि २१ गतेसम्म (सेप्टेम्बर १९ देखि २१) यस नाटकका नियमित मञ्चन दिउँसो २ः३० र साँझ ५ः३० बजे हुनेछन्। साथै, संस्थाले ‘अन्तिम गीत’ असोज १८ देखि २१ गतेसम्म र ‘भावमल्ली’ असोज २३ देखि २५ गतेसम्म मञ्चन गरिने जानकारी पनि दिएको छ ।