काठमाडौं, साउन २२ गते।
नेपाल ट्रेड युनियन कांग्रेस ( एनटीयूसी) का महिला उपाध्यक्ष राधिका कुइकेलले श्रमका खबरहरू सम्पूर्ण श्रमिकका हात हातमा पुर्‍याउन अत्यन्त जरुरी रहेको बताउनुभयो।

उहाँले वर्तमान समयमा श्रमिकका हकहित, अधिकार, तथा उनीहरूको समस्याहरूको बारेमा जानकारी दिनु र उनीहरूको आवाजलाई प्रभावकारी रूपमा उठाउनु ट्रेड युनियनहरूको महत्वपूर्ण जिम्मेवारी भएको  बताउनुभयो।

श्रमिक वर्गका हक, अधिकार र सुरक्षाको सुनिश्चितता गर्नका लागि उनीहरूलाई सही समयमा सही सूचना पुर्‍याउनु आवश्यक छ। “श्रमिकहरूले आफ्नो हकको बारेमा जानकारी नपाएसम्म उनीहरूले अधिकारको संरक्षण गर्न सक्दैनन्,” उहाँले बताउनुभयो।

अहिलेको डिजिटल युगमा सूचना पुर्‍याउन धेरै सजिलो भएको छ। “हामीले प्रविधिको सदुपयोग गरेर श्रमिकहरूलाई सूचना पुर्‍याउन सक्छौं,” उहाँले बताउनुभयो।

सामाजिक सञ्जाल, मोबाइल एप्लिकेशन, र अनलाइन पोर्टलहरूको माध्यमबाट श्रमिकहरूलाई सजिलै जानकारी पुर्‍याउन सकिने उहाँले बताउनुभयो।

श्रमिकहरूको हकहितका लागि कानुनी परामर्श, पेशागत सुरक्षा, र अन्य सेवा प्रदान गर्न समेत यस्ता सूचना प्रणाली उपयोगी हुने बताउनुभयो।

“हामीले हरेक श्रमिकलाई उनीहरूको हक र अधिकारको बारेमा जानकारी दिनुपर्छ,यो जिम्मेवारी केवल ट्रेड युनियनहरूको मात्र होइन, सम्पूर्ण सरोकारवालाहरू मिलेर गर्नुपर्ने काम हो।” उहाँले बताउनुभयो।

यसरी, उहाँले श्रमिकहरूको हकको संरक्षण र उनीहरूको समस्या समाधानका लागि सूचना प्रवाहको महत्त्वमा जोड दिनुभयो।

नेपाल ट्रेड युनियन कांग्रेस राष्ट्रिय प्रचारप्रसार तथा प्रकाशन विभागले “सामाजिक सञ्जाल अभिमुखीकरण कार्यक्रम ” आयोजना गरेको थियो। कार्यक्रममा अध्यक्षता नेपाल ट्रेड युनियन कांग्रेस राष्ट्रिय समितिका महिला उपाध्यक्ष तथा प्रचारप्रसार तथा प्रकाशन विभागका संयोजक राधिका कुइकेलले गर्नुभएको थियो।

कार्यक्रममा ट्रेड युनियन कांग्रेस राष्ट्रिय समितिका उपमहासचिव रुक्मिणी थापा, नेपाल ट्रेड युनियन कांग्रेसका केन्द्रीय सदस्यहरू, आबद्ध राष्ट्रिय सङ्घका प्रचारप्रसार तथा प्रकाशन विभाग हेर्ने प्रतिनिधिहरू , नेपाल ट्रेड युनियन कांग्रेस महिला समितिका अध्यक्ष ,नेपाल ट्रेड युनियन कांग्रेस बागमती प्रदेशको प्रचारप्रसार तथा प्रकाशन हेर्ने प्रतिनिधि, नेपाल ट्रेड युनियन कांग्रेस काठमाडौँ जिल्लाका प्रचारप्रसार तथा प्रकाशन विभाग हेर्ने प्रतिनिधि हरूको उपस्थिति रहेको थियो ।

“सामाजिक सञ्जाल अभिमुखीकरण कार्यक्रम” , पत्रकार लक्ष्मण कार्कीले सहजीकरण गर्नुभएको थियो ।