रामेछाप १५ चैत ।

यो वर्षको माध्यमिक शिक्षा परीक्षा (एसइई) बिहीबारबाट सुरु हुँदै छ । चैत १५ विहीबार देखि २७ गतेसम्म एसइई परीक्षा सञ्चालन हुने छ ।

परीक्षा बिहान ८ बजेदेखि ११ बजेसम्म सञ्चालन हुने छ । दुई नगरपालिका र छ वटा गाउँपालिका रहेको रामेछाप जिल्लाका दुई हजार ७९४ जना विद्यार्थी यो वर्ष एसइई परीक्षामा सहभागी हुने शिक्षा विकास तथा समन्वय इकाई रामेछापले जनाएको छ । यो वर्ष रामेछापमा २२ वटा परीक्षा केन्द्रबाट दुई हजार ७९४ जना परीक्षार्थी परीक्षामा सहभागी हुने शिक्षा विकास तथा समन्वय इकाई रामेछापका प्रमुखले बताउनुभयो ।

उहाँले भन्नुभयो ‘‘यो वर्ष रामेछापबाट दुई हजार ७९४ जना विद्यार्थी एसइई परीक्षामा सहभागी हुँदै छन् । प्राविधिक धारबाट ११० जना, ग्रेड वृद्धिमा २५ जना र खुला विद्यालयका २२ जना विद्यार्थी एसइई परीक्षामा सहभागी हुँदै छन् ।’’ प्राविधिक धारमा बाली विज्ञान तर्फ २१ जना, सिभिल इन्जिनियरिङ तर्फ २० जना, पशु चिकित्सा विज्ञान तर्फ ४२ जना र कम्प्युटर विषयमा ४३ जनाले परीक्षा दिने उहाँले बताउनुभयो ।

उहाँका अनुसार जिल्लाको आठ वटा पालिकामा मध्ये सबै भन्दा बढी मन्थली नगरपालिकामा छ वटा परीक्षा केन्द्रबाट विद्यार्थीले परीक्षा दिँदै छन् । त्यस्तै रामेछाप नगरपालिका, खाँडादेवी गाउँपालिका, सुनापति गाउँपालिका, गोकुलगंगा गाउँपालिका र उमाकुण्ड गाउँपालिकामा दुई–दुई वटा परीक्षा केन्द्रबाट विद्यार्थीले परीक्षा दिँदै छन् । दोरम्बा शैलुङ र लिखुतामाकोशी गाउँपालिकामा तीन–तीन वटा परीक्षा केन्द्र निर्धारण गरिएको छ ।