सल्यान, भदौ १३ गते ।

भोटेकोशी बाढी प्रभावित नागरिकको उद्धार, राहत तथा पुनर्स्थापनाका लागि सल्यानका तीन स्थानीय तहले आर्थिक सहयोग गर्ने निर्णय गरेका छन् । कुमाख गाउँपालिकाले प्रधानमन्त्री दैवी प्रकोप उद्धार कोषमा जम्मा हुने गरी दुई लाख ५० हजार रुपियाँ उपलब्ध गराउने निर्णय गरेको छ ।

यसै गरी त्रिवेणी गाउँपालिकाले राहतका लागि एक लाख ५० हजार रुपियाँ सहयोग गर्ने निर्णय गरेको छ । त्रिवेणी गाउँपालिकाको स्थानीय विपत् व्यवस्थापन समितिको बैठकले बाढीपछि सम्पर्कविहीन भएका आफ्ना ११ जना नागरिकको खोजीका लागि प्रभावित क्षेत्रमा टोली परिचालन गर्ने निर्णयसमेत गरेको छ ।

रोजगारीका सिलसिलामा रसुवा तथा नुवाकोटको त्रिशूली नदीआसपासका क्षेत्रमा गएका र बाढीपछि सम्पर्कमा नआएका नागरिकको खोजी तथा उद्धारका लागि सम्बन्धित निकायसँग समन्वय गर्ने गाउँपालिकाले जनाएको छ । गाउँपालिका अध्यक्ष खिमबहादुर रावतको नेतृत्वमा स्वास्थ्यकर्मी, कर्मचारी तथा प्रभावित परिवारका आफन्तसहितको टोली प्रभावित क्षेत्रमा जाने तयारी गरेको छ ।

यस्तै बागचौर नगरपालिकाले प्रधानमन्त्री दैवीप्रकोप उद्धार कोषमा दुई लाख रुपियाँ उपलब्ध गराउने निर्णय गरेको छ । नगरपालिकाको स्थानीय विपत् व्यवस्थापन समितिको बैठकले बाढीपछि सम्पर्कविहीन नगरवासी प्रमिला बुढाथोकी र आयुष खड्काको खोजी तथा उद्धारका लागि पहल गर्ने निर्णय गरेको छ ।

बागचौर–११, बाफुखोलामा भदौ ८ गते बाढीले बगाउँदा मृत्यु भएका तथा घाइतेका परिवारलाई आवश्यक आर्थिक सहायता उपलब्ध गराउने निर्णय पनि नगरपालिकाले गरेको छ । वर्षाका कारण क्षति भएका सडक मर्मत तथा पहिरो हटाउने र विपत्का कारण पूर्ण रूपमा घर क्षति भएका परिवारलाई नियम अनुसार आर्थिक सहायता उपलब्ध गराउने निर्णय गरिएको नगरपालिकाले जनाएको छ ।

तीन वटै स्थानीय तहले बाढीबाट भएको मानवीय तथा भौतिक क्षतिप्रति दुःख व्यक्त गर्दै मृतकप्रति श्रद्धाञ्जली तथा शोकसन्तप्त परिवारजनमा समवेदना व्यक्त गरेका छन् । साथै प्रभावित नागरिकको शीघ्र उद्धार, राहत वितरण तथा पुनर्स्थापनाका लागि सम्बन्धित निकायसँग समन्वय र सहकार्य गर्न आग्रह गरेका छन् । मौसम पूर्वानुमान महाशाखाले सल्यानसहित कर्णाली प्रदेशका विभिन्न जिल्लामा अत्यधिक वर्षाको सम्भावना औँल्याएकाले सम्भावित जोखिमबाट सचेत रहन नागरिकलाई आग्रह गरिएको छ ।

सहयोग उपलब्ध गराउँदै गाउँपालिका

पञ्चकोशी समाचारदाताका अनुसार जिल्लाको गुराँस गाउँपालिकाले भोटेकोशी बाढीबाट प्रभावित नागरिकका लागि दुई लाख रुपियाँ आर्थिक सहयोग गर्ने निर्णय गरेको छ । गुराँस गाउँपालिकाले जारी विज्ञप्ति अनुसार गाउँपालिकाको विपत् कोषमा जम्मा रहेको रकममध्ये दुई लाख रुपियाँ नेपाल सरकारको दैवी प्रकोप उद्धार कोषमा जम्मा गरिने जनाएको हो । विपत्का समयमा खोज, उद्धार तथा तत्काल राहत वितरणमा टेवा पुगोस् भन्ने उद्देश्यले पालिकाले सहयोग गरेको जनाएको छ ।

यसै गरी कालीकोट समाचारदाताका अनुसार कालीकोट जिल्लाको महाबै गाउँपालिकाले पनि बाढी प्रभावितका लागि दुई लाख सहयोग दिने घोषणा गरेको छ । गाउँपालिका अध्यक्ष खेमबहादुर सिहंले बाढीमा ज्यान गुमाएकाको सम्झानामा एक दिन शोक बिदा दिने निर्णय गरिएको पनि बताउनुभयो ।