काठमाडौँ, साउन २८ गते ।

 नेपाल वायुसेवा निगमले गौतम बुद्ध अन्तर्राष्ट्रिय विमानस्थललाई सञ्चालनको आधार (अपरेटिङ बेस) बनाएर उडान गर्ने तयारी अघि बढाएको छ । विमानस्थलका महाप्रबन्धक श्यामकिशोर शाहका अनुसार आगामी नोभेम्बरदेखि सुरु हुने हिउँदे उडान तालिका अनुसार निगमले भैरहवालाई अपरेटिङ बेस बनाएर उडान गर्ने तयारी अनुसार बुधबारदेखि परीक्षण उडान सुरु गरेको हो ।उहाँले भन्नुभयो, “निगमले भैरहवामा आफ्नो एउटा न्यारोबडी जहाज राखेर उडान सुरु गर्ने योजना अनुसार परीक्षण उडान सुरु गरेको छ ।

निगमले आफ्ना फस्ट अफिसर (पाइलट) लाई एयर बस ३२० जहाजमार्फत बेस ट्रेनिङ फ्लाइट गराउन सुरु गरेकाले आगामी हिउँदे उडान तालिका अनुसार भैरहवामा एउटा जहाज राखेर नियमित उडान सुरु गर्न सक्छ ।”

निगमले सुरु गरेको प्रशिक्षण कार्यक्रम साउन २७ गतेदेखि भदौ ३ गतेसम्म सञ्चालन हुने उहाँले जानकारी दिनुभयो । पहिले निगमले गरेका उडान सीमित रहेको र सीमित चालकले मात्रै भैरहवामा उडान गरेकाले अब नियमित उडान तथा डाइभर्ट भएका जहाजसमेत भैरहवामा अवतरण गर्ने तयारी रहेको उहाँले बताउनुभयो ।

विमानस्थल कार्यालयका प्रवक्ता कुमार सुजखुका अनुसार विसं २०८० पुस १६ गतेदेखि विसं २०८१ पुस १६ गतेसम्म अन्तर्राष्ट्रियतर्फ भैरहवामा २९७ जहाज उडान अवतरण भएका छन् । उक्त उडान अवतरणबाट नौ हजार ८९ यात्रुले हवाईसेवा लिएका छन् । त्यस्तै विसं २०८२ साउन १ गतेदेखि फागुन २७ गतेसम्म भएका १७० उडान अवतरणबाट छ हजार ८७४ यात्रुले अन्तर्राष्ट्रिय हवाईसेवा लिएका छन् ।