ताप्लेजुङ, साउन २३ गते ।

ताप्लेजुङको मैवाखोला गाउँपालिकाले विपन्न नागरिकको स्वास्थ्य बिमा गरिदिने भएको छ । गाउँपालिकाले ‘अध्यक्ष स्वास्थ्य बिमा कार्यक्रम’मार्फत विपन्न नागरिकको स्वास्थ्य बिमा गरिदिने भएको हो ।

गुणस्तरीय स्वास्थ्य सेवामा पहुँच अभिवृद्धि गर्ने लक्ष्यसहित गाउँपालिकाले चालु आर्थिक वर्षमा विपन्न तथा लक्षित वर्गका नागरिकको स्वास्थ्य बीमा गर्ने भएको हो । ‘स्वस्थ्य नागरिक, स्वस्थ्य मैवाखोला’ को अवधारणालाई अघि सारेको नीतिको कार्यान्वयनअन्तर्गत विपन्न नागरिकको स्वास्थ्य बिमा पालिकाले गरी दिनेभएको छ ।

स्वास्थ्य बिमा कार्यक्रमका लागि चालु आवमा ३५ लाख रुपियाँ बजेट विनियोजन गरिएको गाउँपालिका अध्यक्ष विजयप्रकाश वनेमले जानकारी दिनुभयो । अध्यक्ष वनेमका अनुसार विनियोजित बजेटबाट विपन्न नागरिकको स्वास्थ्य बीमा गरिने छ । गाउँपालिकाले यसअघि ज्येष्ठ तथा अपाङ्गता भएका नागरिकको घर–घरमा पुगेर स्वास्थ्य परीक्षण गर्ने गरेको थियो ।

यस्तै स्वास्थ्य संस्थामार्फात निःशुल्क उपलब्ध गराइने ९८ प्रकारका औषधी खरिद तथा वितरण गर्न र दीर्घरोगीहरुको उपचारमा सहयोग गर्न पालिकाले ‘अध्यक्ष स्वास्थ्य कोष’ को अवधारणासमेत ल्याएको छ । पालिकाभित्रका स्वास्थ्य स्वास्थ्यमा आवश्यक पर्ने उपकरणको व्यवस्थासहित पालिकावासी नागरिकको स्वास्थ्य सुधारसँग सम्बन्धित क्रियाकलापमा खर्च गर्नेगरी पालिकाले चालु आवमा एक करोड २७ लाख ५३ हजार रुपियाँ बजेट विनियोजन गरेको जनाएको छ ।