काठमाडौँ, साउन ५ गते ।

जल तथा मौसम विज्ञान विभागले देशका विभिन्न भागमा बाढीको जोखिम रहेको जनाउँदै उच्च सतर्कता अपनाउन सर्वसाधारणलाई आग्रह गरेको छ । विभागका अनुसार विशेष गरी लुम्बिनी र गण्डकी प्रदेशका पाँच जिल्ला गोरखा, दाङ, अर्घाखाँची, कपिलवस्तु र रूपन्देहीमा बाढीको उच्च जोखिम देखिएको हो । यी जिल्लाका नदी तटीय क्षेत्रमा बसोबास गर्ने नागरिकलाई विशेष सावधानी अपनाउन र सुरक्षित स्थानमा रहन सुझाइएको छ । जल तथा मौसम विज्ञान विभागकी नायब जलविज्ञ सहायक पार्वती पनेरूका अनुसार यी पाँच जिल्लाबाहेक कोशी, बागमती, लुम्बिनी, गण्डकी, कर्णाली र सुदूरपश्चिम प्रदेशका केही अन्य जिल्लामा पनि मध्यमस्तरको बाढी आउन सक्ने सम्भावना रहेको छ ।

विभागले ती क्षेत्रमा पनि सतर्कता अपनाउन र नदीको सतहको निरन्तर अनुगमन गर्न अनुरोध गरेको छ । उहाँले मङ्गलबार र बुधबारसम्मको मौसम पूर्वानुमान अनुसार देशका धेरै जसो स्थानमा वर्षाको सम्भावना रहेको र यसले गर्दा साना तथा ठुला नदीमा जलस्तर बढ्न सक्ने बताउनुभयो । विभागले बुधबारदेखि वर्षा कम हुने जानकारी दिएको छ ।