कल्याणपुर (सप्तरी), जेठ १७ गते ।

 महिलाको सम्मान, रोजगारी तथा आर्थिक अवसर अभिवृद्धि गर्ने उद्देश्यले सप्तरीको विष्णुपुर गाउँपालिका–३ मा सिलाइ–कटाइ तालिम सञ्चालन गरिएको छ।

विष्णुपुर गाउँपालिकाको सहयोग तथा सप्तरी समाज कल्याण सेवा, राजविराजको आयोजनामा सञ्चालित तालिमको गाउँपालिका अध्यक्ष उमेशप्रसाद यादवले शनिबार एक कार्यक्रमबीच उद्घाटन गर्नुभयो।

उद्घाटन कार्यक्रममा अध्यक्ष यादवले महिलालाई सीपमूलक तालिम प्रदान गरी आत्मनिर्भर बनाउने गाउँपालिकाको नीतिअनुरूप तालिम सञ्चालन गरिएको बताउनुभयो। उहाँले सीप हासिल गरेपछि महिलाले आफ्नै घरबाट व्यवसाय सञ्चालन गरी आम्दानी गर्न सक्ने विश्वास व्यक्त गर्नुभयो।

तालिम सम्पन्न भएपछि सहभागी महिलालाई स्वरोजगारमा लाग्न सहज होस् भन्ने उद्देश्यले सिलाइ मेसिनसमेत उपलब्ध गराइने प्रतिबद्धता अध्यक्ष यादवले जनाउनुभयो।

तालिमले महिलाको आर्थिक सशक्तीकरणमा टेवा पुग्नुका साथै स्थानीयस्तरमै रोजगारीका अवसर सिर्जना गर्न सहयोग पुग्ने अपेक्षा गरिएको विष्णुपुर गाउँपालिकाले जनाएको छ।

तालिममा सहभागी महिलालाई सिलाइ–कटाइसम्बन्धी व्यावहारिक ज्ञान तथा सीप प्रदान गरिने बताइएको छ। तालिम उद्घाटन कार्यक्रममा जनप्रतिनिधि, स्थानीय अगुवा तथा सहभागी महिलाको उपस्थिति रहेको थियो।