काठमाडौँ, वैशाख १७ गते ।

नेपाली कम्युनिस्ट पार्टी (नेकपा) ले आगामी मङ्सिर ११ देखि १५ गतेसम्म राष्ट्रिय महाधिवेशन गर्ने भएको छ । नेकपा केन्द्रीय कार्यालय पेरिसडाँडामा  बसेको केन्द्रीय कार्य संयोजन समितिको बैठकले काठमाडौँमा महाधिवेशन गर्ने निर्णय गरेको हो ।

नेकपा प्रवक्ता प्रकाश ज्वालाले विभिन्न कम्युनिस्ट घटकबिच एकता भएपछि राष्ट्रिय महाधिवेशन मङ्सिरमा गर्ने निर्णय भएको जानकारी दिनुभयो । नेकपा (माओवादी केन्द्र), एकीकृत समाजवादीसहित २७ दलबिच एकता भएर नेकपा बनाएको हो । “पार्टीको जेठ मसान्तसम्म सङ्घ, प्रदेश, पालिका वडा र जनवर्गीय सङ्गठनको समायोजन गर्ने, असार र साउनमा श्रम शिविर र सदस्यता नवीकरण गर्ने निर्णय भएको छ, उहाँले भन्नुभयो, “आगामी भदौ १५ सम्म वडा अधिवेशन, भदौ मसान्तसम्म पालिका, असोज मसान्तसम्म जिल्ला, कात्तिक १५ प्रदेश अधिवेशन गर्ने कार्यतालिका बनाइएको छ ।”