काठमाडौं, भाद्र २२ गते ।

नेपाल ट्रेड युनियन कांग्रेसको राष्ट्रिय समितिको आठौं बैठक काठमाडौँमा सम्पन्न भएको छ।

बैठकमा नेपाल ट्रेड युनियन कांग्रेस राष्ट्रिय समितिका सम्पूर्ण पदाधिकारी, ट्रेड युनियन कांग्रेसका केन्द्रीय समितिका सदस्यहरू, सातवटै प्रदेश समितिका अध्यक्षहरू, २७ वटै आबद्ध सङ्घका अध्यक्षहरू, महिला समिति तथा युवा समितिका अध्यक्षसहितको उपस्थितिमा बैठक सम्पन्न भएको हो।

बैठकमा महासङ्घका महासचिव अजयकुमार राईले सांगठनिक प्रतिवेदन प्रस्तुत गर्नुभएको थियो भने आर्थिक प्रतिवेदन केन्द्रीय कोषाध्यक्ष संजय दाहालले प्रस्तुत गर्नुभएको थियो। दुवै प्रतिवेदनमाथि विस्तृत छलफल गरी सर्वसम्मतिले पारित गरेको थियो।

बैठकमा उपस्थित बहुसंख्यक सदस्यहरूले सांगठनिक र आर्थिक प्रतिवेदनमाथि आआफ्ना धारणा राख्नुभएको थियो।

बैठकले विगतका गतिविधिहरूको समीक्षा गर्दै भावी योजनाबारे गहन छलफल गरेको थियो।बैठकको अध्यक्षता गर्नु भएको ट्रेड युनियन कांग्रेसका अध्यक्ष योगेन्द्र कुँवरले २०८२ साल साउन १ गतेदेखि लागू भएको न्यूनतम वेतन तथा योगदानमा आधारित सामाजिक सुरक्षा कार्यक्रम श्रमिकले पूर्णरूपमा उपभोग गर्न सक्ने वातावरण बनाउन नेपाल ट्रेड युनियन कांग्रेसका सम्पूर्ण संरचनालाई सक्रिय रूपमा परिचालन गर्न निर्देशन दिनुभयो।

बैठकमा राखिएका सम्पूर्ण एजेन्डाहरू सर्वसम्मतिबाट पारित गरी बैठक सम्पन्न भएको ट्रेड युनियन कांग्रेसका महासचिव अजयकुमार राईले जानकारी दिनुभयो।