काठमाडौँ , साउन ९ गते।

नेपाली काङ्ग्रेसका सभापति शेरबहादुर देउवाले मुलुकको आवश्यकताका आधारमा संविधान संशोधन हुने बताउनुभएको छ।

काठमाडौँमा शुक्रबार ढुण्डीराज शास्त्रीको स्वर्गारोहणको ४५ दिनको स्मृतिमा आयोजित कार्यक्रममा देउवाले संविधान सबैका लागि स्वीकार्य भए पनि केही कुरा संशोधन गर्न आवश्यक देखिएको बताउनुभयो।

संविधान संशोधनको आवाज उठ्नु स्वभाविक कुरा हो, उहाँले भन्नुभयो ‘आवश्यकता अनुसार संशोधन हुन्छ ।’

राष्ट्रिय सभाको अध्यक्ष उपराष्ट्रपतिलाई बनाउनुपर्छ भन्ने धारणा ओलीजीको छ, त्यो पक्षमा म पनि छु । भारतसहित अन्य देशमा पनि त्यस्तो व्यवस्था छ , कार्यक्रममा उहाँले बताउनुभयो ।

नाममा कम्युनिस्ट भए पनि व्यवहारमा सबै पार्टीहरूले प्रजातान्त्रिक समाजवादी पार्टीको रुपमा काम गरिरहेको उहाँले बताउनु भएको छ।

अहिलेको व्यवस्था अनुसार कुनै पनि दलको बहुमत आउन गाह्रो भएकाले अरु दलसँग मिल्नुपर्ने बाध्यता रहेको उहाँले बताउनु भएको छ।

कार्यक्रमकाे सभापतित्व सहिद स्मृति प्रतिष्ठानका अध्यक्ष खिलानाथ दाहालले गर्नुभएको थियो भने ,नेताहरू कृष्णप्रसाद सिटौला , बिमलेन्द्र निधि , अर्जुन नरसिंह केसी लगायत नेताहरूको उपस्थिति रहेको थियो।