काठमाडौं, असार ५ गते ।

संघीय निजामती सेवा विधेयक २०८० मा समावेश गरिएको दुई वर्षे कुलिङ पिरियड (शीतकालीन अवधिको नियम) को प्रावधान हटाउन गरिएको चलखेलप्रति नेपाल ट्रेड युनियन कांग्रेस (NTUC) ले गम्भीर आपत्ति जनाएको छ।

राज्य व्यवस्था तथा सुशासन समितिबाट पारित भई संघीय संसदमा पेश भएको सो विधेयकमा, कुनै निजामती वा सरकारी सेवाबाट राजीनामा दिएको वा अवकाश पाएको कर्मचारीले दुई वर्ष पूरा नभएसम्म संवैधानिक वा सरकारी पदमा नियुक्ति हुन नपाउने व्यवस्था गरिएको छ।

तर, हाल उक्त प्रावधानलाई केही राजनीतिक दल, स्वार्थ समूह र उच्च पदस्थ अधिकारीहरू मिलेर हटाउने प्रयास भइरहेको भन्दै युनियनले विज्ञप्ति मार्फत विरोध जनाएको हो।

विज्ञप्तिमा भनिएको छ, “ कुलिङ पिरियडको व्यवस्था गर्नुको उद्देश्य सार्वजनिक सेवामा निष्पक्षता, पारदर्शिता र सुशासन कायम गर्नु, स्वार्थको द्वन्द्व न्यूनीकरण गर्नु, कर्मचारीको मनोबल र मर्यादा जोगाउनु र संवेदनशील जानकारीको दुरुपयोग रोक्नु हो। ”

नेपाल ट्रेड युनियन कांग्रेसका अध्यक्ष योगेन्द्रकुमार कुँवरले विज्ञप्ति मार्फत मन्त्रिपरिषद् , राज्य व्यवस्था तथा सुशासन समिति र सम्पूर्ण संघीय सांसदहरूलाई उक्त व्यवस्था यथावत् राखी विधेयक पास गराउन आग्रह गर्नुभएको छ।