सिड्नी, जेठ २२ गते ।

 अस्ट्रेलियाका वैज्ञानिकहरूले भवन निर्माण र भत्काउने क्रममा निस्कने फोहोर लागेका काठ छुट्याउन सक्ने नयाँ प्रविधि विकास गरेका छन् । यो प्रविधिले काठमा रङ, तेल, फलाम, सिमेन्ट जस्ता वस्तु लागेको भए पनि ९१ प्रतिशतसम्म शुद्धताका साथ छुट्याउन सक्छ ।

मोनाश विश्वविद्यालय र अस्ट्रेलियाको चाल्र्स डार्विन विश्वविद्यालयका अनुसन्धानकर्ताहरूले संयुक्त रूपमा तयार पारेको यो यन्त्रले सामान्य तस्बिरको माध्यमबाट काठमा फोहोर लागेको छ कि छैन भन्ने छुट्याउन सक्छ ।

हालसम्म यस्ता काठहरूमा रङ, रसायन वा धातुका टुक्रा लागेपछि छुट्याउन गाह्रो हुने भएकाले प्रायः सिधै फोहोरमैला स्थानमा फालिन्थ्यो । अब, यो प्रविधिको प्रयोगले क्यामेरा, मोबाइल, ड्रोनमार्फत सफा र फोहोर लागेका काठ सजिलै छुट्याउन सकिनेछ ।

यस प्रविधिबाट निर्माण क्षेत्रमा निस्कने फोहोर कम गर्न, उपयोगी काठ पुनः प्रयोग गर्न, तथा खर्च र समयको बचत गर्न सकिनेछ ।

अनुसन्धान टोलीका प्रमुख वैज्ञानिक मदिनी डि अल्विसले भन्नुभयो,“हामीले विकास गरेको यो प्रविधि सजिलो, प्रभावकारी र विश्वव्यापी समस्या समाधान गर्न उपयोगी छ । यसले पुनः प्रयोगको सम्भावना बढाउने र वातावरण संरक्षणमा सहयोग पुर्‍याउनेछ ।”

अस्ट्रेलियामा विकास गरिएको यो प्रविधिले केवल त्यहाँको मात्र नभई विश्वभरको निर्माण फोहोर व्यवस्थापनमा ठुलो सहयोग पुर्‍याउने वैज्ञानिकहरूले विश्वास गरेको ।