काठमाडौँ, जेठ १६ गते ।

आगामी आर्थिक वर्ष २०८२/८३ का लागि सरकारले ऊर्जा, जलस्रोत तथा सिँचाइ मन्त्रालयलाई रु. ८६ अर्ब १ करोडको बजेट विनियोजन गरेको छ। ऊर्जा उत्पादन, प्रशारण, सिँचाइ पूर्वाधार र जलजन्य विपद् व्यवस्थापनमा केन्द्रित बजेटले वैकल्पिक ऊर्जाको प्रवर्द्धन, सिँचाइ सुविधा विस्तार र जलस्रोतको बहुउपयोगी उपयोगमा जोड दिएको छ।

बजेट विवरण अनुसार वैकल्पिक ऊर्जा (सौर्य, वायु तथा जैविक ऊर्जा) विकासमा रु. २ अर्ब ३३, करोड विनियोजन गरिएको छ। विद्युत् प्रशारण तथा वितरण पूर्वाधारमा रु. १३ अर्ब १८ करोड छुट्याइएको छ।

भेरी–बबई सिँचाइ आयोजना निर्माणमा रु. ८ अर्ब ५० करोड, र हेडवर्क्स तथा पावरहाउस सम्पन्न गर्न थप रु. २ अर्ब ७ करोड विनियोजन गरिएको छ। यस्तै, सुनकोशी–मरिन पथान्तरण आयोजना अगाडि बढाउन रु. २ अर्ब ७३ करोड बजेट प्रस्ताव गरिएको छ।

विभिन्न नहरहरूको मर्मत तथा सुधारका लागि रु. १ अर्ब ८२ करोड, लिफ्ट सिँचाइ विस्तार (विशेष गरी कृषियोग्य टारहरूमा) का लागि रु. ३ अर्ब ३१ करोड छुट्याइएको छ।

सरकारले बहुउद्देश्यीय जलविद्युत् आयोजना तथा सिँचाइ आयोजना अध्ययन तथा तयारीका लागि रु. ३७ करोड विनियोजन गरेको छ। साथै जलजन्य विपद् व्यवस्थापन र मौसम प्रणाली सुदृढीकरणका लागि रु. ५ अर्ब ५९ करोड बजेट छुट्याइएको छ।

सरकारको यो बजेटले जलस्रोतको दीर्घकालीन उपयोग, ऊर्जा आत्मनिर्भरता र कृषि उत्पादनमा वृद्धि हुने विश्वास गरिएको छ।