काठमाडौँ, असोज ३० गते।

नेपाली कांग्रेसको १५औँ महाधिवेशनबाट नेपाल ट्रेड युनियन कांग्रेसका अध्यक्ष योगेन्द्रकुमार कुँवर, पूर्वअध्यक्ष खिलानाथ दाहाल र केन्द्रीय सदस्य सीतादेवी काफ्ले कांग्रेस केन्द्रीय सदस्यमा निर्वाचित हुनुभएको छ ।

उहाँहरु नेपाली कांग्रेसको श्रमिक क्लस्टरतर्फको केन्द्रीय सदस्यमा निर्वाचित हुनुभएको हो । कांग्रेसको विधान अनुसार श्रमिक क्लस्टरतर्फ खुला दुई र महिला एक गरि ३ पदको व्यवस्था छ । उक्त तीन पदका लागि ९ जना प्रतिस्पर्धामा उत्रिएका थिए ।

श्रमिक आन्दोलनमा लामो समयदेखि सक्रिय रहँदै आउनुभएका कुँवर नेपाल ट्रेड युनियन कांग्रेसका अध्यक्ष, दाहाल पुर्व अध्यक्ष र काफ्ले ट्रेड युनियन कांग्रेसमा केन्द्रीय सदस्य हुनुहुन्छ ।

ट्रेड युनियन कांग्रेसले विगत लामो समयदेखि पार्टी र नीति निर्माण तहमा श्रमिक प्रतिनिधित्व मुद्दालाई उठाउदै आएको थियो । कांग्रेसको विशेष महाधिवेशनबाट संशोधित विधानमा वडादेखी केन्द्रसम्मै श्रमिक प्रतिनिधित्वको सुनिश्चित गरेकोछ।

उहाँहरु निर्वाचित हुनुले पार्टीभित्र श्रमिकको प्रतिनिधित्व र श्रमिकका मुद्दालाई थप सशक्त रूपमा उठाउने अपेक्षा गरिएको छ ।