गलकोट (बागलुङ), असोज १३ गते ।

 बागलुङको निसीखोला गाउँपालिकाले विपद्बाट प्रभावित परिवारलाई राहत तथा आर्थिक सहयोग उपलब्ध गराइएको छ । असोज ११ गते आइतबार निसीखोलामा आएको बाढीले क्षति पुर्‍याएपछि गाउँपालिकाले नगद राहत उपलब्ध गराएको निसीखोला गाउँपालिकाका अध्यक्ष सुर्यबहादुर घर्तीले जानकारी दिनुभयो ।

गाउँपालिकाले विपद्का कारण ज्यान गुमाएका व्यक्तिका परिवार, पूर्ण जोखिममा रहेका तथा जोखिममा रहेका परिवारलाई वर्गीकरण गरी आर्थिक सहयोग उपलब्ध गराएको हो ।

निसीखोलामा बाढी तथा पहिरोका कारण पाँच जनाको मृत्यु भएको छ भने २४ घरमा पूर्ण क्षति भएको छ । २१ जनाको घर उच्च जोखिममा रहेको छ ।

गाउँपालिकाका अनुसार मृतकका परिवारलाई प्रतिव्यक्ति रु. ५० हजार, पूर्ण जोखिममा रहेका परिवारलाई रु. ३० हजार र जोखिममा रहेका परिवारलाई रु. १० हजारका दरले राहत उपलब्ध गराइएको छ । पाँच जना मृतकको परिवार, घरमा क्षति भएका ३२  परिवार र घरमा आंशिक क्षति भएका २१ परिवारलाई सहयोग प्रदान गरिएको छ ।

विपद्बाट प्रभावित परिवारलाई तत्काल राहत प्रदान गरी उनीहरूको दैनिकी सहज बनाउन आर्थिक सहयोग उपलब्ध गराइएको गाउँपालिकाले जनाएको छ ।