काठमाडौँ, भदौ ९ गते  ।

युवा, श्रम तथा रोजगारमन्त्री रामजी यादवले संयुक्त अरब इमिरेट्स (युएई) जाने श्रमिकले लिनुपर्ने प्रहरी चारित्रिक प्रमाणपत्र (पुलिस रिपोर्ट) सम्बन्धी विद्यमान दोहोरो प्रक्रियालाई सरल बनाउन आग्रह गर्नुभएको छ । सोमबार मन्त्री यादव र नेपालका लागि (युएई) का राजदूत अब्दुल्ला सइद मुबारक जारवान अल सामसीबिच भएको भेटमा यस्तो आग्रह गर्नुभएको हो ।

भेटमा मन्त्री यादवले नेपाली श्रमिक युएई जाँदा लिनुपर्ने प्रहरी चारित्रिक प्रमाणपत्रसम्बन्धी विद्यमान दोहोरो प्रक्रियालाई सरल बनाउँदै श्रमिकलाई सहज हुने व्यवस्था मिलाउन राजदूत अल शामसीसँग अनुरोध गर्नुभयो । राजदूत सामसीले युएई सरकारसँग निरन्तर छलफल र समन्वय भइरहेको जानकारी गराउँदै यसलाई सहज बनाउन आवश्यक पहल जारी रहने आश्वासन दिनुभयो । भेटमा नेपाल र युएईबिच भएका द्विपक्षीय श्रमसम्बन्धी समझदारी तथा सहमतिको प्रभावकारी कार्यान्वयनका लागि संयुक्त कार्य समूहको बैठक शीघ्र आयोजना गर्ने विषयमा सहमति जुटेको छ ।