सिन्धुपाल्चोक, भदौ ५ गते  ।

सिन्धुपाल्चोकको लिसङ्खुपाखर गाउँपालिका–५, मुढेक्षेत्र ‘मुढेको आलु’ का लागि प्रख्यात छ । पछिल्लो समय मुढे आलुसँगै स्वादिष्ट छुर्पी उत्पादन हुने क्षेत्रका रूपमा पनि परिचित हुन थालेको छ ।

मुढेको छुर्पीको स्वादका कारण पछिल्लो समय स्वदेशी तथा विदेशी उपभोक्तामाझ यसको माग बढ्दै गएको छ । मुढेमा दैनिक १० लाख रुपियाँभन्दा बढीको छुर्पी बिक्री हुने गरेको छुर्पी तथा होटेल व्यवसाय गर्दै आएका इराज लामाले जानकारी दिनुभयो ।

हिमाली क्षेत्रका चौँरी, गाई तथा भैँसीको दुधबाट उत्पादन हुने छुर्पी स्वादिष्ट हुने भएकाले स्वदेशी तथा विदेशीले मुढेबाट दैनिक ठुलो परिमाणमा छुर्पी खरिद गरेर लैजाने गरेका छन् । लेकाली क्षेत्रका चौँरी, गाई तथा भैँसीको दुधबाट उत्पादित छुर्पी खरिद गर्न काठमाडौँका व्यापारीसमेत मुढे पुग्ने गरेका छन् ।

उनीहरूले छुर्पीसँगै मुडेका आलुसमेत खरिद गरी काठमाडौँलगायतका बजारमाबिक्री गर्दै आएका छन् । मुढेको हावापानी चिसो छ । हिउँद होस् वा वर्षा, यहाँको मौसम प्रायः चिसो रहने गर्छ । हिउँदमा मुढेक्षेत्रमा बेला बेलामा हिमपातसमेत हुने गरेको छ । यही चिसो मौसममा स्थानीय महिलाले घरेलु रूपमा उत्पादन गर्ने छुर्पीको स्वाद मिठो हुने भएकाले यसको बिक्री बढ्दै गएको व्यवसायी लामाले बताउनुभयो ।

मुढे हुँदै ओखलढुङ्गा, चरीकोट, जिरी, रामेछापलगायतका जिल्ला जानेआउने गरिन्छ । स्वदेशी तथा विदेशी पर्यटक पनि मुढे हुँदै विभिन्न गन्तव्यमा पुग्ने गरेका छन् । मुढेमा खाना खाने तथा बास बस्ने पर्यटकले छुर्पी र आलु खरिद गरेर लैजाने गरेका कारण छुर्पीको बजार विस्तारमा सहयोग पुगेको लामाले बताउनुभयो ।

मुढेको छुर्पी देशविदेशका बजारमा पुग्न थालेपछि स्थानीय सरकारले किसानलाई छुर्पी उत्पादनमा प्रोत्साहन गर्न थालेको लिसङ्खुपाखर गाउँपालिकाका अध्यक्ष राजु लामाले बताउनुभयो । उहाँका अनुसार मुढेको छुर्पी भारत, चीन, अमेरिका, बेलायत, जापान, क्यानडालगायतका देशमा समेत पुग्न थालेको छ ।