काठमाडौँ, साउन १७ गते ।

राजन गुरुङ लगातार दोस्रो जित हासल गरी प्रथम काठमाडौँ खेलमण्डल (एनआरटी) नेपाल टप १६ ग्रान्ड मास्टर्स स्नुकर च्याम्पियनसिपको क्वाटरफाइनलमा पुग्न सफल हुनुभएको छ ।

काठमाडौँ खेल मण्डल (एनआरटी) को आयोजनामा त्रिपुरेश्वरस्थित क्लबकै भवनमा भएको प्रतियोगिताको चौथो दिन शनिबार राजनले आयुष गौतमलाई बेस्ट अफ सेभेन अन्तर्गतको खेलमा ४–० ले सजिलै पराजित गर्नुभयो । यसअघि, उहाँले विकास महर्जनलाई ४–२ ले हराउनुभएको थियो । राजनसँग पराजित भएपछि विकासले शनिबार अमन कार्कीलाई ४–० ले हराएर अन्तिम आठमा पुग्ने आफ्नो सम्भावना कायम राख्नुभएको छ । यसै गरी पहिलो खेलमा हार बेहोरेका राजन लामाले पनि आफ्नो दोस्रो खेलमा जय महर्जनलाई रोमाञ्चक ढङ्गले ४–३ ले हराएर शीर्ष आठमा पुग्ने सम्भावना जिवित राख्नुभयो । जय र अमनले लगातार दोस्रो हार बेहोर्नुभएको हो ।

यस प्रतियोगितामा नेपालका शीर्ष १५ खेलाडीका साथै आयोजकका एक खेलाडीको पनि सहभागिता रहेको छ । प्रतियोगितामा १६ जनालाई चार समूहमा विभाजन गरिएको छ । प्रत्येक समूहबाट शीर्ष दुई खेलाडी क्वाटरफाइनलमा प्रवेश गर्ने प्रावधान रहेको छ ।