काठमाडौँ, वैशाख ९ गते ।

अर्थमन्त्री डा. स्वर्णिम वाग्लेले विदेशी लगानीका आयोजना निर्माणमा भएको ढिलासुस्तीप्रति असन्तुष्टि जनाउनुभएको छ । मङ्गलबार सम्पन्न लगानी बोर्डको अनुगमन तथा सहजीकरण समितिको १३ औँ बैठकमा उहाँले लगानी स्वीकृत भएका ५५ आयोजनामध्ये दुई वटा मात्र निर्माणमा जानु ‘लाजमर्दो’ भएको बताउनुभयो । उहाँले विदेशी लगानी स्वीकृत भएर पनि लामो समय काम नभएको विषयमा निर्मम समीक्षा हुने उल्लेख गर्नुभयो ।

बैठकका क्रममा अर्थमन्त्री वाग्लेले समस्याको तुरुन्त पहिचान गर्न पनि निर्देशन दिनुभयो । “परियोजनामा विदेशी लगानी स्वीकार गरेर आयोजना निर्माणमा थप काम नहुनुमा दोषी को हो ? मान्छे भए मान्छे, कानुन भए कानुन फेर्नैपर्ने अवस्था आयो,” उहाँले भन्नुभयो ।

लगानी सहजीकरण गर्ने शक्तिशाली निकाय निरीह देखिनुले अत्यन्तै गलत सूचना सञ्चार भएको अर्थमन्त्रीले बताउनुभयो । उहाँले १४ औँ बैठकमा समस्या समाधान गरेर थप प्रगति नभए निर्मम भएर अघि बढ्ने बताउनुभयो । “कम्तीमा १० वटा परियोजनामा तत्काल प्रगति देखिनु प¥यो,” उहाँले भन्नुभयो ।

प्रधानमन्त्री वालेन्द्र शाहका नीति, प्रशासन तथा सुशासन सल्लाहकार सुदीप ढकालले देशको भविष्य बोकेका आयोजना र विकासका परियोजनाको हालत अत्यन्तै दयनीय देखिएको बताउनुभयो । परियोजना अघि बढाउन प्रगतिको बाधकको तत्काल सम्बोधन गर्न उहाँले सुझाव दिनुभयो । “कुन निकाय ? कुन व्यक्ति ? के के कारणले समन्वय गर्न नसकेको हो ? अब यो अनुगमन हुन्छ,” उहाँले भन्नुभयो । लगानी बोर्डका प्रमुख कार्यकारी सुशील ज्ञवालीले बोर्डबाट स्वीकृत तथा सहजीकरण गरिरहेका आयोजनाबारे जानकारी गराउनु भएको थियो ।