फुङलिङ, पुस २६ गते ।

ताप्लेजुङमा प्रथम आँप पानी आमन्त्रित गोल्डकप सञ्चालन हुने भएको छ ।

गोल्डकप कक्फेक्वा तङ्नाम (माघे सक्रान्ती) को अवसरमा जिल्लाको आठराई त्रिवेणी गाउँपालिका–४ नेसुममा आगामी पुस २८ गतेदेखि माघ १ गतेसम्म सञ्चालन हुने भएको हो ।

फुङलिङमा शनिबार पत्रकार सम्मेलनको आयोजना गरी गोल्डकपको बारे जानकारी गराइएको हो । आँप पानी युवा क्लबको आयोजनामा सञ्चालन हुने गोल्डकपमा क्लब स्तरीय पुरुष फुटबल प्रतियोगिताको आयोजना गरिने क्लबका सचिव हेमन्त लिम्बूले जानकारी दिनुभएको छ ।

उहाँकाअनुसार प्रतियोगितामा आयोजक सहित ८ टिमको सहभागिता रहने छ । जसमा आयोजक आँपानी युवा क्लब, लिभटी युवा क्लब ढुङ्गेसाघु, सिर्जनशील युवा क्लब तेम्बे, बुङ्धाक युवा क्लब साँघु, हाङपाङ चुङ्वा समाज हाङ्पाङ, मानाभारा युथ स्पोर्टिङ क्लब खेजेनिम, ग्रीन भ्याली स्पोर्टिङ क्लब नाल्बो र साथीभाइ सामाजिक युवा क्लब फुङलिङको सहभागिता रहने छ ।

प्रतियोगिताको विजेताले एक लाख १० हजार रुपियाँसहित ट्रफी, मेडल र प्रमाण पत्र प्राप्त गर्ने छ । यस्तै दोस्रो हुनेले नगद ६० हजार रुपियाँसहित ट्रफी, मेडल र प्रमाण पत्र प्राप्त गर्ने क्लबका अध्यक्ष टेकबहादुर लिम्बूले जानकारी दिनुभयो ।

अन्य विधागत तर्फका लागि पनि उचित पुरस्कारको व्यवस्था गरिएको छ । खेल सम्पन्न गर्नका लागि करिब १० लाख रुपियाँ लागत लाग्ने अनुमान गरिएको आयोजकले जनाएको छ ।