काठमाडौँ, साउन २६ गते ।

 रोजगार अनुमति प्रणाली (ईएपीएस) दक्षिण कोरियामा रोजगारी गरेर फर्केका युवाका लागि सञ्चालित कोरियाली खानाका परिकार बनाउने सात दिने तालिम सम्पन्न भएको छ ।

कोरियाको अन्तर्राष्ट्रिय सहयोग संस्था (कोइका) र कोरिया सरकारअन्र्तगतको मानव संशाधन विभाग (एचआरडी) को संयुक्त आयोजनामा साउन १९ देखि २६ गतेसम्म  कोरियाली खानाका परिकार बनाउने तालिम सोमबार सम्पन्न भएको हो ।

ईपीएसमार्फत दक्षिण कोरिया गएर फर्केका युवाले सो क्रममा आर्जेको पुँजीको स्वदेशमा परिचालन गराउने उद्देश्यले यस प्रकारको तालिम सञ्चालन गरिएको एचआरडी कोरियाका पदाधिकारीहरुको भनाइ छ ।

के हामी परियोजनाले सन् २०२२ देखि दक्षिण कोरियाबाट फर्केका नेपाललाई युवा पुनः विदेश जान नपरोस् र स्वदेशमै स्वरोजगार उद्यमी बन्न सकुन भनेर स्वरोजगारमूलक तालिम सञ्चालन गर्दैआएको छ । यो कार्यक्रमको उद्देश्य कोरियाबाट फर्किने युवालाई दीर्घकालसम्म पुनः एकीकरणका लागि क्षमता विकास गर्नु रहेको छ ।

यस कार्यक्रमले विशेषगरी दक्षिण कोरियामा पूर्व प्रस्थान र फर्किएका युवालाई सहयोग गर्छ । कार्यक्रममा नेपालका लागि दक्षिण कोरियाका राजदूत पार्क ते–युंगले यस प्रकारको तालिमबाट दक्षिण कोरियाबाट फर्केकाको व्यवहारिक सीपलाई सुदृढ बनाउने र रोजगार वा उद्यमशीलताको सम्भावना बढाउने विश्वास व्यक्त गर्नुभयो ।

कार्यक्रममा श्रम, रोजगार तथा सामाजिक सुरक्षा मन्त्रालयअन्र्तगतको आन्तरिक रोजगार महाशाखा प्रमुख एवम् सहसचिव कृष्णप्रसाद सापकोटाले दक्षिण कोरियाबाट फर्केका युवा लक्षित यस प्रकारको तालिम आन्तरिक रोजगार व्यवस्थापनमा असाध्य महत्वपूर्ण भएको बताउनुुभयो ।

तालिममा आठ महिला र सात पुरूष गरी १५ जनाको सहभागिता रहेको थियो । व्यावहारिक सिकाइमा केन्द्रित सो तालिममा किम्ची, बिबिम्बाप, सिफुड, कोरियाली स्टयू तथा टोकबोकीजस्ता परिकार बाउन सिकाइएको थियो । तालिममा सहभागीहरूले तालिम असाध्यै उपयोगी भएको र पछिल्लो समय नेपालीले नयाँ स्वादका लागि किम्ची, कोरियन सिफुड, स्टयु र टोकबोकी माग गर्ने गरेको बताउनुभयो ।