काठमाडौँ, कात्तिक २४ गते ।

 मर्मत तथा स्तरोन्नतिका लागि त्रिभुवन अन्तर्राष्ट्रिय विमानस्थल दैनिक १० घण्टा बन्द गरिँदा केही विदेशी विमान सेवाले भाडा बढाउने पहल गरेका छन् । विमानस्थल बन्द हुने जानकारी पहिले नै गराएका कारण त्यसो गर्न उचित नहुने बताइएको छ ।

विमानस्थल बन्द भएका कारण उत्पन्न समस्याबारे परराष्ट्र, श्रम र नागरिक उड्डयन तीन मन्त्रीसहितको छलफलमा त्यस्तो बताइएको हो । परराष्ट्रमन्त्री डा. आरजु राणाले त्रिभुवन अन्तर्राष्ट्रिय विमानस्थल कार्यालयले मर्मतका लागि विमानस्थल सञ्चालनको समय कटौती गरेपछि हवाई उडानका क्षेत्रमा उत्पन्न समस्याको समाधान खोज्न श्रम, रोजगार तथा सामाजिक सुरक्षा एवं संस्कृति, पर्यटन तथा नागरिक उड्डयन मन्त्रालयसँग आग्रह गर्नुभएको हो ।

विमानस्थल कार्यालयले उडानको समय दैनिक १० घण्टा घटाएपछि विदेशी वायुसेवा कम्पनीले काठमाडौँ उडानमा कटौती गरेका छन् । यही कारण देखाएर वायुसेवा कम्पनीले पनि नेपालबाट हुने उडानमा दोब्बर भाडा बढाएपछि समस्या उत्पन्न भएको हो ।

शुक्रबार परराष्ट्र मन्त्रालयमा श्रममन्त्री शरत्सिंह भण्डारी र संस्कृति, पर्यटन तथा नागरिक उड्डयनमन्त्री बद्री पाण्डेसहितको बैठकमा मन्त्री डा. राणाले उहाँहरूलाई विकसित पछिल्लो परिस्थिति अध्ययन गरी आवश्यक निकासका लागि सो आग्रह गर्नुभएको हो ।

बैठकमा नेपाल वैदेशिक रोजगार व्यवसायी सङ्घका प्रतिनिधिले उक्त समस्याको समाधानका लागि आग्रह गर्दै मन्त्री डा. राणालाई ज्ञापनपत्र दिनुभएको थियो । उहाँहरूले विमानस्थलले उडान समयमा गरेको कटौतीका कारण देखाएर हवाई कम्पनीले दोब्बरभन्दा बढी भाडा वृद्धि गरेको र यसका कारण नेपालबाट वैदेशिक रोजगारीमा जाने श्रमिक मारमा परेको जानकारी गराउनुभएको थियो ।

बैठकमा मन्त्री डा. राणाले भन्नुभयो, “वैदेशिक रोजगारीमा जाने नेपालीलाई महँगो टिकटका कारण समस्या परेको त छँदै छ, यो मारमा अरू पनि परेकाले धेरै गुनासो आएको छ । हवाई कम्पनीले एकाधिकार गरेका छन् भने उनीहरूलाई नियमन गरी आवश्यक प्रक्रियाभित्र ल्याउनु पर्छ ।”

नेपालबाट टिकट नपाउने तथा धेरै नै महँगो हुने समस्या भएकाले वैदेशिक रोजगारीमा जाने नेपालीलाई केही समयका लागि भारतको विमानस्थल हुँदै जानुपर्ने अवस्थाका लागि कूटनीतिक पहल गरिदिन सङ्घका अध्यक्ष राजेन्द्र भण्डारी, पूर्वअध्यक्ष विमल गौतम एवं प्रनिनिधि प्रज्ञान न्यौपानेलगायतले मन्त्री डा. राणासँग आग्रह गर्नुभएको थियो ।

मन्त्री राणाले त्यस्तो अवस्था आएमा आफूले कूटनीतिक पहल गर्ने आश्वासन पनि दिनुभएको थियो । उहाँले विमानस्थल मर्मत गरिने सूचना नेपालले छ महिनाअघिदेखि नै दिएकाले अहिले आएर विदेशी हवाई कम्पनीले अस्वाभाविक रूपमा भाडा वृद्धि गर्न नहुने बताउनुभयो ।

मन्त्री भण्डारीले श्रमिकलाई अहिले मर्का पर्नु त छँदै छ, यो समस्या राष्ट्रिय समस्या पनि भएकाले समाधानका उपायको खोजी गरिने जानकारी दिनुभयो । अर्का मन्त्री पाण्डेले विमानस्थल मर्मतको कामको सूचना पहिल्यैदेखि दिइएकाले अहिले हवाई कम्पनीले आफूखुसी मूल्यवृद्धि गर्न नपाउने जिकिर गर्दै समस्याको समाधानका विकल्पबारे छलफल गरिरहेको बताउनुभयो ।

उहाँले विमानस्थल मर्मत पनि गर्नैपर्ने काम भएकाले यसलाई निरन्तरता दिँदै यसबाट उत्पन्न असहज परस्थितिको समाधानका लागि विकल्प खोजिने बताउनुभयो ।