जानकी (बाँके), २८ पुसः नेपालगञ्जबाट काठमाडौँ जाँदै गरेको यात्रुबाहक बस दाङको भालुवाङस्थित राप्ती नदीमा खस्दा चार यात्रुको मृत्यु भएको छ । भे१ख ३९१२ नम्बरको माउन्टेन एयर न्यू बस शुक्रबार राति साढे १० बजेतिर राप्ती नदीमा खस्दा हालसम्म चार जनाको मृत्यु भएको जिल्ला प्रहरी कार्यालय दाङका प्रहरी प्रमुख प्रहरी उपरीक्षक रामबहादुर केसीले जनकारी दिनुभयो ।

प्रहरी प्रमुख केसीका अनुसार घाइते २० यात्रुलाई प्रस्तावित अस्पताल भालुवाङ र लमही अस्पताल लमहीमा उपचारका लागि लगिएको छ । मृतक र घाइतेहरुको भने पहिचान खुल्न सकेको छैन । घटनाको थप विवरण आउन बाँकी रहेको उहाँले बताउनुभयो ।

घटनास्थलमा स्थानीय, सशस्त्र प्रहरी र नेपाल प्रहरीको टोलीले उद्धार जारी राखेको प्रहरी उपरीक्षक केसीले बताउनुभयो । बस चालकलाई प्रहरीले नियन्त्रणमा लिएको ईलाका प्रहरी कार्यालय भालुवाङले जनाएको छ ।