काठमाडौँ, कात्तिक २१ गते ।

ग्लोबल आइएमई बैङ्क लिमिटेडले काठमाडौँको उत्तरढोकामा कर्पोरेट भवन निर्माणको काम अघि बढाएको छ । निर्माणस्थलमा शुक्रबार आयोजित एक समारोहबिच बैङ्क सञ्चालक समितिका अध्यक्ष चन्द्रप्रसाद ढकाल र प्रमुख कार्यकारी अधिकृत सुरेन्द्रराज रेग्मीले विधिपूर्वक जगको पूजा (भूमिपूजा) गरेर भवन निर्माणको औपचारिक सुरुआत गर्नुभएको हो ।

करिब एक लाख ४६ हजार वर्गफिटमा फैलिने यो भवन कुल १२ तलाको हुने छ । भवनमा गाडी पार्किङका लागि दुई तलाको भूमिगत बेसमेन्ट, एउटा ग्राउन्ड फ्लोर र माथि नौ वटा तला रहने छन् । वातावरणमैत्री पूर्वाधार, आधुनिक वास्तुकला र अत्याधुनिक प्रविधि समेटेर बैङ्कले यसलाई उपत्यकाकै नमुना व्यावसायिक भवनका रूपमा उभ्याउन खोजेको छ ।

भूमिपूजापछि बोल्दै बैङ्कका अध्यक्ष ढकालले यो भवन वाणिज्य बैङ्कहरूका कर्पोरेट कार्यालयमध्य सबैभन्दा आधुनिक र ठुलो संरचनाको हुने बताउनुभयो ।

प्रमुख कार्यकारी अधिकृत रेग्मीले बैङ्कका सेवाग्राही तथा कर्मचारीलाई ध्यानमा राखेर पार्किङदेखि भित्री संरचनासम्ममा आधुनिक इन्जिनियरिङलाई प्राथमिकता दिइएको बताउनुभयो ।