हुम्ला, असोज २९ गते ।

हुम्लाको सदरमुकाम सिमकोट आसपासका क्षेत्रमा स्याउ टिप्न सुरु गरिएको छ । बोटमा फलेको स्याउको रसिलोपन र परिपक्वता मेसिनबाट परीक्षण गर्दा टिप्न योग्य देखिएपछि किसानले बगैँचाबाट स्याउ टिप्न थालेका हुन् ।

सिमकोट गाउँपालिका–५ का मानविर रोकायाले कृषि प्राविधिकको सल्लाहअनुसार बोटबाट स्याउ टिप्न सुरु गरेको बताउनुभयो । उहाँले ५३ बोटको स्याउ बगैँचा लगाउनुभएको छ । उहाँको बगैँचामा गोल्डेन र रेड डेलिसियस जातका स्याउ फलेका छन् । स्याउ टिप्न सुरु गरेको र सबै टिप्न अझै दुई दिन लाग्ने उहाँले बताउनुभयो ।

रोकायाले टिपेका स्याउ कार्टुनमा प्याकिङसमेत गरिरहनुभएको छ । उहाँका अनुसार बगैँचाबाट साढे आठ क्विन्टल स्याउ उत्पादन हुने अनुमान छ । उत्पादित सबै स्याउ काठमाडौं पठाउने तयारी गरिएको उहाँले बताउनुभयो ।

त्यसैगरी, सिमकोट गाउँपालिका–२, ठेहेका गोरासिंह बोहराले पनि आफ्नो बगैँचामा स्याउ टिप्न सुरु गर्नुभएको छ । उहाँको बगैँचामा तीन सय बोट स्याउ छन् । ग्राहकबाट आएको अर्डरअनुसार स्याउ टिप्ने गरेको उहाँले बताउनुभयो । हालसम्म डेढ लाख रुपैयाँको स्याउ बिक्री गरिसक्नुभएका बोहराको बगैँचामा अझै धेरै स्याउ बाँकी छन् ।

सिमकोट गाउँपालिका–४, बुराउसेका छक्क लामाले पनि आफ्नो बगैँचाबाट स्याउ टिप्न सुरु गर्नुभएको छ । उहाँले चार सय बोटमा स्याउ लगाउनुभएको छ । यस वर्ष स्याउ उत्पादन राम्रो भएकाले हुम्लाबाटै सुर्खेत, नेपालगञ्ज र काठमाडौंसम्म स्याउ पुर्‍याउने तयारी गरेको लामाले बताउनुभयो ।

कच्ची भए पनि सडक सञ्जाल जोडिएपछि हुम्लामा उत्पादित स्याउले बजार पाउन थालेको छ । जिल्लामा स्याउको मूल्य ग्रेडअनुसार निर्धारण गरिएको छ । ए ग्रेडको स्याउ प्रतिकिलो ६० रुपियाँ, बी ग्रेडको ५० रुपियाँ र सी ग्रेडको ४० रुपियाँमा बिक्री हुने गरेको छ ।