अर्घाखाँची, असोज १२ गते ।

सामान्यतः रोपेको तीनदेखि चार वर्षपछि फल दिन थाल्ने कफी अर्घाखाँचीको सन्धिखर्क नगरपालिका–८, किमडाँडाका कृषक पुष्करनाथ बन्जाडेको बारीमा भने दोस्रो वर्षमै फल्न थालेको छ ।

बन्जाडेले दुई वर्षअघि रोपेका करिब तीन सय कफीका बिरुवामा अहिले हाँगाभरि फल लागेको छ । कफी खेतीमा खाडल तयारी, जैविक मल, छहारी र नियमित स्याहारमा विशेष ध्यान दिँदा अपेक्षाभन्दा छिटो फल लागेको उहाँको अनुभव छ ।

बन्जाडेले भन्नुभयो, “खाडल राम्रोसँग तयार गरेर गँड्यौला मल प्रयोग गरेँ । बिरुवा रोपेपछि छहारी र स्याहारमा पनि ध्यान दिएँ । त्यसैले दोस्रो वर्षमै फल लाग्यो ।” कफी खेतीका लागि छहारी महìवपूर्ण हुने भएकाले उहाँले लिचीका बोटमुनि कफी लगाउनुभएको छ । लिचीका बोटले कफीलाई आवश्यक छायाँ प्रदान गर्नुका साथै एउटै जमिनबाट विभिन्न बालीमार्फत आम्दानी लिन सकिने अवस्था सिर्जना गरेको छ ।

बन्जाडेको बारीमा बहुबाली खेतीको नमुना देखिन्छ । समथर भागमा कफीका बिरुवा र डिलमा लिचीका बोट लगाइएको छ । यसबाट कफी र लिची दुवैबाट आम्दानी लिन सकिने भएकाले खेतीलाई दीर्घकालीन आम्दानीको आधार बनाउन सकिने उहाँको भनाइ छ । बन्जाडेले नेपालमा उत्पादित कफीको माग स्वदेशमा मात्र नभई अन्तर्राष्ट्रिय बजारमा समेत बढिरहेको बताउनुभयो ।