इनरुवा, चैत १८ गते।

  सुनसरीको इनरुवा नगरपालिका वडा नं. २, कुसुमगाछीमा बर्डफ्लू संक्रमण पुष्टि भएपछि सतर्कता बढाइएको छ। इनरुवा–२ निवासी सुमन कुमार राईले पालेका करिब चार सय ब्रोइलर कुखुरामा संक्रमण देखिएको हो। केन्द्रीय पशुपन्छी रोग अन्वेषण प्रयोगशालाद्वारा परीक्षण गर्दा रोग पुष्टि भएपछि नियन्त्रणका उपाय तीव्र पारिएको छ।

इनरुवा नगरपालिका पशुपन्छी सेवा शाखाका अनुसार संक्रमित फार्मका सबै कुखुरा नष्ट गर्ने (कुलिङ) कार्य सुरु गरिएको छ। संक्रमण फैलिन नदिन फार्म वरिपरि उच्च सतर्कता अपनाइएको छ भने अन्य कुखुरा फार्ममा पनि निगरानी कडा पारिएको छ।

यसैबिच, किसानहरूलाई लक्षित गर्दै नगरपालिका पशु सेवा शाखाले निःशुल्क जैविक सुरक्षा (बायोसेक्युरिटी) औषधी वितरण सुरु गरेको छ। किसानहरूलाई फार्म, उपकरण र वरिपरि क्षेत्र नियमित रूपमा डिसइन्फेक्सन गर्न आग्रह गरिएको छ। प्राविधिक टोलीले प्रभावित फार्म सिल गर्ने, पूर्ण डिसइन्फेक्सन गर्ने र आवश्यक जैविक सुरक्षा उपाय लागू गर्ने कार्य जारी राखेको छ।

कुखुरामा असामान्य लक्षण देखिएमा तुरुन्त सम्बन्धित निकायलाई जानकारी गराउन तथा बाह्य सम्पर्कबाट कुखुरा जोगाउन पनि सुझाव दिइएको छ।

इनरुवा नगरपालिकाका पशु चिकित्सक डा। राज कुमार यादव ले बर्ड फ्लू अत्यन्त संक्रामक रोग भएको भन्दै उच्च सतर्कता अपनाउन, सरसफाइमा विशेष ध्यान दिन र कुखुराजन्य पदार्थ राम्ररी पकाएर मात्र सेवन गर्न सुझाव दिनुभयो।