पश्चिम नवलपरासी, माघ २० गते ।

प्रकृतिको मृगौलाको रुपमा लिइने सिमसार क्षेत्र नासिँदै गएको बेला पश्चिम नवलपरासीको बर्दघाट नगरपालिकाले सिमसार क्षेत्र संरक्षणलाई प्राथमिकतामा राखेको छ ।

नगरपालिकाले विगत केही वर्षदेखि वडा नम्बर १० स्थित बाउन्न घोला क्षेत्रमा रहेको सिमसारलाई संरक्षण गरेर पर्यटकीय स्थलको रुपमा विकास गरेको छ । सिमसार क्षेत्रमा पोखरी निर्माण गरी थप व्यवस्थित गरिएको छ भने पर्यटक मैत्री पूर्वाधार समेत निर्माण गरिएको छ ।

नगर प्रमुख शम्भुलाल श्रेष्ठले नगरपालिकाले जैविक विविधता संरक्षण र पर्यापर्यटनको विकास गर्ने योजना बनाएर सिमसारको संरक्षण र प्रवर्धन गर्दै आएको बताउनुभयो । सिमसारको बिचमा पुल निर्माण, तारबार लगायत पर्यटन प्रवर्धनका पूर्वाधारको निर्माण भएको बताउँदै उहाँले सङ्घीय सरकारबाट समेत बजेट विनियोजन भए पनि अहिले रोकिएको बताउनुभयो । ‘‘तीन करोड बजेट बिनियोजन भएको थियो, उक्त बजेट कार्यान्वयन हुन पाएको भए धेरै काम हुन्थ्यो,’’ श्रेष्ठले भन्नुभयो ।

नगरपालिकाले बर्दघाट नगरपालिकाको वडा नम्बर पाँचमा रहेको सयपत्री सामुदायिक वन क्षेत्रमा पनि सिमसार संरक्षणको योजना बनाएको छ । अहिले उक्त क्षेत्रको संरक्षणका लागि लुम्बिनी प्रदेश सरकारले समेत १० लाख बजेट विनियोजन गरेको छ ।

अहिले सिमसार क्षेत्रमा दैनिक घुम्न जाने, फोटो खिच्ने, टिकटक बनाउने र शान्त वातावरणमा घुमफिर गर्नेको भिड लाग्ने गरेको छ । पूर्व पश्चिम राजमार्गअन्तर्गत बर्दघाटको भुताहा चोकबाट उत्तर तर्फ दाउन्ने सडकको वैकल्पिक मार्गको रुपमा रहेको भुताहा संसारकोट दुम्कीबास सडक खण्डमा पर्ने भएकाले पनि सो सडक खण्ड हुँदै यात्रा गर्ने यात्रुहरू समेत सिमसारमा ओर्लिएर फोटो भिडियो खिच्ने गरेका छन् ।

पूर्व नगर प्रमुख धिरज शर्मा बस्यालको कार्यकाल देखिनै नगरको गौरवको योजनाको रुपमा उक्त सिमसार संरक्षणको काम सुरु भएको थियो । त्यतिबेला बहुवर्षीय योजनाको रुपमा प्राकृतिक ढाप लाई संरक्षण गरेर पोखरी निर्माण गर्ने र भूमिगत पानीको रिचार्जको रुपमा प्रयोग गर्ने योजना बनाइएको थियो ।

जनसङ्ख्या वृद्धि, प्राकृतिक जलस्रोतमाथिको दोहन लगायतका कारणले सिमसार क्षेत्रको अस्तित्व सङ्कटमा परेको बेला बर्दघाट नगरपालिकाले गर्दे आएको सिमसार संरक्षण प्रशंसनीय भएको सरोकारवालाहरूको भनाइ छ ।