कञ्चनपुर, पुस २४ गते ।

 गैरसरकारी संस्था महासंघ नेपाल, जिल्ला शाखा कञ्चनपुरको १२ औँ जिल्ला अधिवेशनबाट अध्यक्षमा अमिर तिरुवा चयन हुनुभएको छ । बुधबार सम्पन्न गैरसरकारी संस्था महासंघ नेपाल, कञ्चनपुरको २४ औँ साधारण सभा तथा १२ औँ जिल्ला अधिवेशनबाट तिरुवा सर्वसम्मत रूपमा अध्यक्ष चयन हुनुभएको हो ।

साथै उपाध्यक्षमा अञ्जु जोशी (भट्ट), सचिवमा शारदा जोशी, सहसचिवमा अम्बादत्त जोशी र कोषाध्यक्षमा नारु सिंह चयन हुनुभएको छ । समितिको सदस्यहरूमा सिता बोहरा, जानकी जोशी, दुर्गा बडूवाल, शिला रैका, ईश्वर उपाध्याय, नैन सिंह पाल, विनोद विक्रम जैरु, माया नेगी र लक्ष्मी चन्द चयन हुनुभएको छ ।

नयाँ नेतृत्वले जिल्ला भित्र रहेका गैरसरकारी संस्थाहरूको सुदृढीकरण गर्दै सामाजिक विकासमा योगदान दिने प्रतिबद्धता जनाएको छ । अधिवेशनको उद्घाटन कार्यक्रममा स्थानीय योजना, कानुन निर्माण प्रक्रियामा सहभागिता तथा संलग्नता, वकालत र दिगो विकासमा नागरिक संघ संस्थाहरूको भूमिका विषयक बहुपक्षीय संवाद गरिएको थियो । कार्यक्रममा सहभागीहरूले गैर सरकारी संस्थाहरूले समाज रुपान्तणमा उल्लेख्य भूमिका निर्वाह गर्नुपर्ने साथै कोठे कार्यक्रममा मात्रै सीमित नहुने प्रतिबद्धता जनाएका छन् । साथै जनजीविकाका मुद्दालाई प्राथमिकतामा राख्नुपर्ने विषयमा विशेष जोड दिएका थिए ।

यसैबिच, गैरसरकारी संस्था महासंघ नेपाल, जिल्ला शाखा कञ्चनपुरमा आबद्ध सङ्घसंस्थाहरूले पत्रकार महासंघ कञ्चनपुरका अध्यक्ष सुरेश धामीको उपचारका लागि ७३ हजार ९०५ रुपियाँ आर्थिक सहयोग प्रदान गरेका छन् । यसैबिच, पत्रकार महासंघ शाखा कञ्चनपुरका महिला उपाध्यक्ष धर्मा रोकायाले गैर सरकारी संस्थाहरूले गर्दै आएका समग्र कार्यक्रम तथा गतिविधिको पत्रकार महासंघलाई पूर्व जानकारी गरी सहजीकरण गर्न आग्रह गर्नुभएको थियो ।