पश्चिम नवलपरासी, वैशाख २ गते ।

 जिल्ला प्रशासन कार्यालय पश्चिम नवलपरासीको सेवा सुविधा सम्पन्न नयाँ भवनबाट सुरु भएको छ । भाडाको भवनबाट सेवा प्रवाह गर्दे आएको जिल्ला प्रशासन कार्यालयको भवन निर्माण सम्पन्न भएपछि बुधबारबाट सबै सेवा नयाँ प्रशासनिक भवनबाट सुरु गरिएको प्रमुख जिल्ला अधिकारी दिपकराज नेपालले जानकारी दिनुभयो । कार्यालय व्यवस्थापनका समान्य काम बाँकी भएपनि सेवाग्राहीलाई सबै सेवाहरू सहज रुपमा सुरु गरिएको उहाँले बताउनुभयो ।

२०७९ साल चैतमा ठेक्का सम्झौता भई बिएम कन्स्ट्रक्सन प्रालीले निर्माण थालेको उक्त तीन तले भवन २१ महिना भित्र निर्माण सम्पन्न हुनुपर्ने भए पनि प्रारम्भिक डिजाइनमा त्रुटि हुँदा निर्माणमा ढिलाइ भएको हो । जसका कारण दैनिक प्रशासन कार्यालयलाई भाडाको व्ययभार बढिरहेको थियो । एक समय अलपत्र बनेको उक्त भवन भिओ भेरिफिकेसन अर्डर संशोधन गरेर स्वीकृत गरेपछि पुनर्निर्माण सुचारु भएर ठेकेदारले हस्तान्तरण गरेको हो ।

मासिक दुई लाख २२ हजार भाडा तिरेर कार्यालय सञ्चालन हुँदै आएकाले भवन हस्तान्तरण भएको एक हप्तामै नयाँ भवनबाट सेवा सुरु गरिएको प्रमुख जिल्ला अधिकारी नेपालले बताउनुभयो । घाम पानीमा ओत लाग्न मिल्ने गरि सेवाग्राहीको लागी फराकिलो स्थान भएकाले नयाँ भवनबाट सेवाग्राहीलाई थप सहज रुपमा सेवा प्रदान गर्न सकिने सहायक प्रमुख जिल्ला अधिकारी पोषणराज भण्डारीले बताउनुभयो ।