काठमाडौं, कार्तिक १२ गते ।

काठमाडौं उपत्यकामा प्रस्तावित मेट्रो रेलमार्गको सम्भाव्यता अध्ययन, रुट निर्धारण तथा लगानीको तयारीसम्बन्धी छलफल भइरहेका बेला कागेश्वरी मनोहरा नगरपालिकाका नगरप्रमुख उपेन्द्र कार्कीले कागेश्वरी मनोहराहुँदै साँखुसम्म मेट्रो रेलमार्ग विस्तार गर्न माग गर्नुभएको छ।

उपत्यकाको सार्वजनिक यातायातलाई व्यवस्थित, सहज र प्रभावकारी बनाउने उद्देश्यले प्रस्तावित रेलमार्गका सम्भावित रुट तथा योजनाबारे सरकारी निकाय र जापानको सहयोगी संस्था JICA को प्राविधिक टोलीले विभिन्न नगरपालिकाका जनप्रतिनिधिसँग छलफल गरिरहेको छ।

 कागेश्वरी मनोहरा नगरपालिकामा आयोजित छलफल कार्यक्रममा सहभागी हुँदै नगरप्रमुख कार्कीले उत्तरपूर्वी काठमाडौंलाई समेत समेट्ने गरी मेट्रो रेलमार्गको रुट निर्धारण गर्नुपर्ने माग राख्नुभएको हो।

नगरप्रमुख कार्कीले कागेश्वरी मनोहरा हुँदै साँखुसम्म रेलमार्ग जोड्न सके उत्तरपूर्वी काठमाडौंका बासिन्दालाई राजधानीका प्रमुख व्यापारिक, शैक्षिक तथा प्रशासनिक केन्द्रसम्म आवतजावत गर्न सहज हुने अपेक्षा व्यक्त गर्नुभयाे।

काठमाडौं उपत्यकाको दीर्घकालीन यातायात व्यवस्थापनका लागि तयार गरिएको काठमाडौं उपत्यका सहरी यातायात प्रणाली गुरुयोजना मा उच्च क्षमताको सार्वजनिक यातायात, मेट्रो रेल तथा अन्य वैकल्पिक यातायात प्रणालीका सम्भावनाबारे अध्ययन अघि बढाइएको छ। गुरुयोजनामा रत्नपार्क–भक्तपुर रेलमार्गलाई प्राथमिकताका साथ अध्ययन गर्ने प्रस्तावसमेत समेटिएको छ।

प्रस्तावित रुटको नक्सामा कागेश्वरी मनोहरा नगरपालिकाको वडा नम्बर ९ क्षेत्रसमेत देखाइएको छ।

नगर प्रमुख कार्कीको माग कार्यान्वयन भएमा उपत्यकाको उत्तरपूर्वी क्षेत्रमा पर्ने कागेश्वरी मनोहरा र साँखु क्षेत्रका बासिन्दालाई समेत आधुनिक सार्वजनिक यातायातको पहुँच विस्तार गर्ने सम्भावना रहनेछ।

काठमाडौं उपत्यका सहरी यातायात गुरुयोजना (Kathmandu Valley Urban Transport System Master Plan) अन्तर्गत प्रस्ताव गरिएको भक्तपुर–रत्नपार्क MRT रेलमार्ग १४.६ किलोमिटर लामो हुने प्रारम्भिक विवरणमा उल्लेख छ। यसमा ११ वटा स्टेशन प्रस्ताव गरिएका छन्।

प्रस्तावित रेलमार्ग भक्तपुरको जगाती क्षेत्रबाट सुरु भएर सूर्यविनायक, सल्लाघारी, मध्यपुर थिमि, गठ्ठाघर, जडीबुटी, तिनकुने, नयाँ बानेश्वर र बबरमहल हुँदै रत्नपार्कसम्म पुग्ने अवधारणा छ।