फिदिम, असोज १९ गते ।

पाँचथर जिल्लाका बालबालिकालाई पहिलो पटक स्वर्णबिन्दु प्राशन गराउन थालिएको छ। आयुर्वेद चिकित्सा पद्धतिअनुसार सुनको भस्मलाई घिउ र महमा घोलेर तयार पारिएको घोललाई स्वर्णबिन्दु भनिन्छ। यसको प्राशन गराउँदा बालबालिकाको सामाजिक, मानसिक, शारीरिक तथा बौद्धिक विकासमा प्रभावकारी हुने चिकित्सकहरू बताउँछन्।

जिल्ला आयुर्वेद स्वास्थ्य केन्द्र, पाँचथरले सोमबार बिहानैदेखि एक वर्षदेखि पाँच वर्षसम्मका बालबालिकालाई स्वर्णबिन्दु प्राशन गराउन थालेको हो।

अब यो अभियान हरेक महिनाको पुष्य नक्षत्रका दिन सञ्चालन गरिनेछ। स्वर्णबिन्दु प्राशन गराउन बिहानैदेखि अभिभावकहरू आफ्ना बालबालिकालाई लिएर जिल्ला आयुर्वेद स्वास्थ्य केन्द्र पुगेका छन्।

जिल्लामा पहिलो पटक कम्तीमा एक हजार बालबालिकालाई स्वर्णबिन्दु प्राशन गराउने कार्यक्रम तय भएको स्वास्थ्य केन्द्रका प्रमुख डा. दिलीपकुमार यादवले बताउनुभयो।

स्वर्णबिन्दु प्राशन कार्यक्रमको शुभारम्भ प्रमुख जिल्ला अधिकारी वासुदेव दाहाल र फिदिम नगरपालिकाका प्रमुख मित्रप्रसाद काफ्लेको उपस्थितिमा जिल्ला समन्वय समिति पाँचथरका प्रमुख रामराज आङदेम्बेले गर्नुभएको थियो। सोमबार दिनभर बालबालिकालाई स्वर्णबिन्दु प्राशन गराउने कार्यक्रम जारी रहने डा. यादवले बताउनुभयो।