सुर्खेत, वैशाख ७ गते ।

हुम्लाको दक्षिणी भेगमा पर्ने अदानचुली गाउँपालिकाको श्रीनगर बजारमा वर्षासहितको बाढीले ठुलो क्षति पुर्‍यायो । बिहीबार बिहानको वर्षाका कारण श्रीनगर बजार क्षेत्र र मुगुको सोरु गाउँपालिका–३, भिहीस्थित बैन्यामा ठुलो क्षति पुगेको हो ।

हुम्लाका प्रहरी प्रमुख प्रहरी नायब उपरीक्षक शङ्कर पोखरेलका अनुसार केही सरकारी कार्यालय र पसलमा समेत क्षति पुगेको छ । करिब १५ मिनेटसम्म परेको मुसलधारे वर्षाले पसलमा क्षति पुगेको छ । यसका साथै बजारक्षेत्रमा रहेका सरकारी कार्यालय, विद्यालय र घरटहरामा समेत क्षति पुगेको प्रहरीले जनाएको छ । अदानचुली–३, गोरपालीका धर्मराज बुढाको गोठ बाढीसहितको लेदोले पुर्दा २७ वटा बाख्रा मरेका छन् भने २९ वटालाई घाइते अवस्थामा उद्धार गरिएको छ । २० वटा बाख्रा बाढीपहिरोसँगै हराएको पोखरेलले बताउनुभयो ।

मुगुको बैन्यामा आएको बाढीका कारण कर्णाली नदी केही समय अवरुद्ध भएको थियो । बैन्यामा जमिन चिरा चिरा परेको छ भने सो रुटबाट भिही पुग्ने सडक अवरुद्ध बनेको छ । यता श्रीनगर आउजाउ गर्ने सबै सडक बन्द भएको प्रहरीले जनाएको छ । बेमौसमी बाढीले वितण्डा मच्चाएको छ । कुनै पनि मानवीय क्षति भने नभएको प्रहरी उपरीक्षक पोखरेलले जानकारी दिनुभयो । उहाँका अनुसार खाद्यसहितका सरकारी कार्यालय र पसलमा क्षति पुगेको छ ।

कमजोर भूबनोट अनि भौगोलिक विकटताका कारण कर्णाली विपत्को उच्च जोखिममा रहेको छ । वर्षामा बाढीपहिरोबाट ठुलो क्षति हुन्छ । हिउँदमा आगलागी र हावाहुरीबाट जनधनको नाश भइरहेको छ । जहिल्यै प्राकृतिक विपत्को चपेटामा पर्ने गरेको छ । यो वर्ष कर्णालीमा ६२० वटा विपत्का घटना भएका छन् । प्रदेशभर विपत्का घटनामा २६ जनाको मृत्यु भएको छ भने एक जना बेपत्ता छन् । १३९ जना घाइते भएका छन् । यसै गरी प्रदेश प्रहरी कार्यालय सुर्खेतको तथ्याङ्क हेर्दा पछिल्ला चार आर्थिक वर्षमा विपत्का घटनाबाट ४१९ जनाले ज्यान गुमाएका छन् । यो अवधिमा चार हजार ५७९ विपत्का घटना भएका थिए ।

आर्थिक वर्ष २०७७/७८ मा ४१६ विपत्का घटना भएकोमा ८५ जनाको मृत्यु भएको थियो । आव २०७८/७९ मा एक हजार २१६ विपत्का घटना भए । उक्त वर्ष ६८ जनाले ज्यान गुमाएका थिए । यसै गरी आव २०७९/८० मा दुई हजार २१४ विपत्का घटना हुँदा ७२ जनाको मृत्यु भएको थियो । आव २०८०/८१ मा ७३३ विपत्का घटना भएकोमा १९४ जनाको मृत्यु भएको तथ्याङ्क छ । पछिल्लो समय विपत्का घटना कम भए पनि मानवीय क्षति बढी हुने गरेको छ ।