खोटाङ, कात्तिक १३ गते : सुनकोशीमा आएको बाढीले क्षतिग्रस्त बनेको झोलुङ्गे पुल मर्मत नहुँदा खोटाङको डिकुवाका स्थानीय पुलमा झुन्डिएर नदी वारपार गर्न बाध्य भएका छन् । गत असोज १२ गते सुनकोशीमा आएको बाढीले पुल बगाएपछि अहिले डिकुवाका नागरिक ज्यानको बाजी राखेर नदी वारपार गर्नु परेको हो ।

सुनकोशीमा आएको बाढीले खोटाङको हलेसी तुवाचुङ नगरपालिका–२, डिकुवा र उदयपुरको ताप्ली गाउँपालिका–५, रूपटारको निबुवाटार जोड्ने झोलुङ्गे पुल क्षतिग्रस्त बनाएको छ । हालसम्म पुल मर्मतमा कुनै पनि निकायले ध्यान नदिँदा स्थानीयवासी पुलमा झुन्डिएर नदी वारपार गर्न बाध्य बनेका हुन् । डिकुवा–निबुवाटार जोड्ने पुलको दायाँबायाँको सपोर्ट लट्ठा चुँडिनुका साथै खोटाङतर्फको टावर ढल्किँदा पुल कोल्टिएको छ तर कतिपय स्थानीय जोखिम मोलेर कोल्टिएको पुलबाट झुन्डिएर आवतजावत गरिरहेको डिकुवा आधारभूत विद्यालयका प्रधानाध्यापक प्रमेश तिलुङ राईले बताउनुभयो ।

बाढीले डिकुवा–निबुवाटारसहित डिकुवा चारबोटे र उदयपुरको कटारी नगरपालिका–१०, सोरुङछबिसे जोड्ने झोलुङ्गे पुल बगाएको थियो । डिकुवाको चारबोटे र सोरुङछबिसे जोड्ने झोलुङ्गे पुल आवतजावत गर्नै नमिल्ने गरी क्षतिग्रस्त भएको छ । नजिकको दुई झोलुङ्गे पुल बाढीले बगाएपछि डिकुवाका स्थानीयले विकल्पमा बाइटार र उदयपुरको कटारी नगरपालिका–१०, सोरुङछबिसेको चिपटार तथा डिकुवा र उदयपुरको रूपटार जोड्ने राजदह पुल प्रयोग गर्नुपर्ने बाध्यता सुरु भएको छ तर सुनकोशी बाढीले बाँकी राखेको पुल पुग्न करिब दुई घण्टा घुम्नुपर्ने भएपछि कतिपय स्थानीयले जोखिम मोलेर क्षतिग्रस्त पुलकै प्रयोग गरिरहेको प्रअ राईले बताउनुभयो । तारजालीविहीन क्षतिग्रस्त पुलबाट वारपार गर्ने व्रmममा स्थानीय नदीमा खस्ने त्रास जोखिम बढेको छ ।

डिकुवाको चारबोटे र सोरुङछबिसे जोड्ने झोलुङ्गे पुल भत्किएपछि सोरुङछबिसेस्थित बेँसीगाउँका विद्यार्थी डिकुवाको डिकुवा आधारभूत विद्यालय जान सकेका छैनन् । सोरुङछबिसेबाट सुनकोशी पुल तरेर दैनिक १६ जना विद्यार्थी डिकुवा आधारभूत विद्यालयमा जानेआउने गरेका थिए तर आवतजावत गर्न नमिल्ने गरी झोलुङ्गे पुल क्षतिग्रस्त बनेर झुन्डिएपछि विद्यार्थी पढ्नबाट वञ्चित भएको प्रअ राईले बताउनुभयो ।

कक्षा ८ सम्म पढाइ हुने विद्यालयमा सोरुङछबिसेबाट बाल विकासदेखि कक्षा ८ सम्मका विद्यार्थी आउने गरेका छन् । सो विद्यालयमा ७८ जना विद्यार्थी अध्ययनरत छन् ।

यस्तै डिकुवा र निबुवाटार जोड्ने झोलुङ्गे पुल बगेपछि डिकुवाका विद्यार्थीको स्कुल जाने बाटो बन्द भएको छ । डिकुवाका कक्षा ९ देखि कक्षा १२ सम्म अध्ययनरत ११ विद्यार्थी दैनिक पुल तरेर रूपटारको महेन्द्र माविमा जानेआउने गरेका थिए ।