मकवानपुर, कात्तिक १२ गते  । 

हेटौँडामा केन्द्रीय कार्यालय रहेको बागमती विश्वविद्यालय र चीनको इस्ट चाइना युनिभर्सिटी अफ टेक्नोलोजीबिच शैक्षिक सहकार्यका लागि समझदारी भएको छ । चीनमा आयोजित एक कार्यक्रममा दुवै विश्वविद्यालयबिच समझदारीपत्रमा हस्ताक्षर भएको बागमती विश्वविद्यालयले जनाएको छ । समझदारीपत्रमा बागमती विश्वविद्यालयका अध्यक्ष प्राडा चन्द्रमणि पौडेल र इस्ट चाइना युनिभर्सिटी अफ टेक्नोलोजीका उपाध्यक्ष प्राडा देङ जुजीले हस्ताक्षर गर्नुभएको हो ।

समझदारी अनुसार विद्यार्थी आदानप्रदान, प्राध्यापकको क्षमता अभिवृद्धि, संयुक्त अनुसन्धान तथा दोहोरो उपाधि (डुअल डिग्री) कार्यव्रmम सञ्चालनको सम्भावनालगायतका क्षेत्रमा सहकार्य गरिने बताइएको छ । यसबाट दुवै विश्वविद्यालयबिच शैक्षिक सम्बन्ध विस्तार हुनुका साथै अन्तर्राष्ट्रिय शैक्षिक आदानप्रदान र अनुसन्धान गतिविधिलाई प्रवर्धन गर्ने अपेक्षा गरिएको छ । बागमती विश्वविद्यालयका उपाध्यक्ष डा. कुसुमराज सुवेदीले सूचना प्रविधिसम्बन्धी विषयमा अध्ययनरत विद्यार्थीको अनुभव आदानप्रदान र क्षमता अभिवृद्धिमा सहयोग पु-याउनु समझदारीको प्रमुख उद्देश्य रहेको बताउनुभयो । उहाँले समझदारीले विद्यार्थी तथा प्राध्यापकको ज्ञान, सिप र अनुभव आदानप्रदान गर्न तथा संयुक्त अनुसन्धानका अवसर सिर्जना गर्न सहयोग पुग्ने बताउनुभयो ।

हस्ताक्षर कार्यक्रममा बागमती विश्वविद्यालयको अन्तर्राष्ट्रिय तथा जनसम्पर्क केन्द्रका निर्देशक डा. ताराप्रसाद बन्जाडे र इस्ट चाइना युनिभर्सिटी अफ टेक्नोलोजीको अन्तर्राष्ट्रिय सहयोग तथा आदानप्रदान कार्यालयका निर्देशक प्रा. यु जेनको उपस्थिति थियो ।

बागमती विश्वविद्यालय र चीनको इस्ट चाइना युनिभर्सिटी अफ टेक्नोलोजीबिच भएको शैक्षिक सहकार्यसम्बन्धी समझदारीपत्र आदानप्रदान गरिँदै ।