लेखनाथ, भदौ २७ गते।

पृथ्वीचोकस्थित पोखरा बसपार्कमा रहेका भूमिहीन तथा अव्यवस्थित बसोबासीको व्यवस्थापन प्रक्रिया आइतबारदेखि पुनः सुरु हुने भएको छ । भूमिहीनका लागि जग्गा खोजी तथा बीचमा बिक्री भएका जग्गाको छानबिन गर्न बसपार्क खाली गराउने अभियान केही समय रोकिएको थियो ।

भोटेकोसीमा आएको बाढीपछि उद्धार तथा राहतका काममा प्राथमिकता दिनुपरेकाले अभियान केही दिन रोकिएको पोखरा महानगरपालिकाका प्रमुख धनराज आचार्यले बताउनुभयो । उहाँले आइतबारदेखि बाँकी निर्णय प्रक्रिया पुनः अगाडि बढ्ने जानकारी दिनुभयो ।

नयाँ बस्ती व्यवस्थापन तथा सुकुमबासी समस्या समाधानका लागि गठित जिल्ला समितिको निर्णय प्रक्रिया पनि सँगसँगै अघि बढिरहेको छ । मनसुन क्रमशः कमजोर हुँदै गएकाले बसपार्क क्षेत्रको समस्या समाधानसँगै फिर्के खोलाको बाँकी कामसमेत अघि बढाइने प्रमुख आचार्यले बताउनुभयो ।

महानगरपालिकाले गरेको छानबिनको अन्तिम प्रतिवेदनअनुसार बसपार्क क्षेत्रमा ३२५ परिवार भूमिहीन र २४२ परिवार अव्यवस्थित बसोबासी रहेका छन् । महानगर कार्यपालिकाको बैठकले भूमिहीन तथा अव्यवस्थित बसोबासीको विवरणसमेत प्रमाणीकरण गरिसकेको छ ।

पृथ्वी राजमार्ग र सिद्धार्थ राजमार्गको सङ्गमस्थल पृथ्वीचोकमा सुविधासम्पन्न बसपार्क निर्माणका लागि विसं २०३२ मा जग्गा अधिग्रहण गरिएको थियो । हाल बसपार्कको जग्गामा पाँच वटा सुकुमबासी टोल, सरकारी विद्यालय तथा अन्य व्यक्तिका घरसमेत रहेका छन् ।