काठमाडौँ, असार १३ गते ।

त्रिभुवन अन्तर्राष्ट्रिय विमानस्थलमा सामान निकासी जाँचपासका लागि जडान गरिएका उपकरणको मर्मतसम्भारमा लापर्बाही हुँदा कार्गो आयातनिर्यात ठप्प हुने अवस्थामा पुगेको छ ।

विमानस्थलको कार्गो वेयर हाउसमा सामान निकासी जाँचपासका क्रममा प्रयोगमा आउने उपकरण सञ्चालन र मर्मतसम्भार नेपाल पारवहन तथा गोदाम लिमिटेडले गर्दै आएको छ तर हवाई माध्यममार्फत आयातनिर्यात हुने देशकै प्रमुख कार्गो वेयर हाउसमा रहेका एक्सरे (स्क्यानिङ) मेसिन, तौल लिने मेसिन तथा हवाई कम्पनीलाई तौलको प्रिन्ट दिने मेसिन बिग्रिएको लामो समयसम्म मर्मत नहुँदा कार्गो व्यवसायी निकासी बन्द गर्ने अवस्थामा पुगेका हुन् ।

कार्गो व्यवसायी खेमराज सुवेदीले नेपाल पारवहन तथा गोदाम लिमिटेड र नेपाल वायु सेवा निगमले बिग्रिएको मेसिनको मर्मतसम्भार नगर्दा, निगमले विमानस्थलको भूमिस्थ प्रबन्धतर्फ तथा गोदाममा जनशक्ति र उपकरण नथप्दा र भन्सार एजेन्टको लापर्बाहीका कारण कार्गो समान जाँचपासमा समस्या भएको बताउनुभयो ।

उहाँले भन्नुभयो, “हाल यहाँबाट दैनिक ५० हजारदेखि एक लाख टनसम्म कार्गो आयातनिर्यात हुँदै आएको छ तर प्रविधिमैत्री हुनुपर्ने निकायका दुई वटा स्क्यानिङ मेसिनमध्ये एक र तौल जाँच्न जडान गरिएका पाँच वटा मेसिनमध्ये दुई वटा बिग्रिएको लामो समय भइसक्दा सम्बन्धित निकायको मर्मतसम्भारमा ध्यान गएको छैन । प्रिन्ट दिने दुईमध्ये एक बिग्रिएको र चालु मेसिनसमेत चल्न छाडेपछि कार्गो निकासीमा विलम्ब थपिएको छ ।”

विगतका वर्षमा पनि यस्ता समस्या भोग्दै र आन्दोलित हुँदै आए पनि अहिले जस्तो समस्या नभएको बताउँदै उहाँले भित्र र बाहिर रहेका तौल मेसिनले समेत फरक तौल देखाउने गरेको जानकारी दिनुभयो । उहाँले सामान जाँचपास गराउन धेरै समस्या भएकाले बाध्य भएर सामान पठाउन रोक्नुपर्ने अवस्था आएको जानकारी दिनुभयो ।

सामान ओसारपसार तथा ढुवानीका लागि निगमसँग ट्याक्टर, ट्रलीलगायतका पर्याप्त उपकरण नहुँदा यसले सरकारलाई राजस्व सङ्कलनमा असर परिरहेको बताउँदै उहाँले भन्नुभयो, “यो संवेदनशील स्थान हो । यहाँबाट क्लियर भएको सामान जहाजमा जान्छ । जाँचपासमा हुने लापर्बाहीले सुरक्षा संवेदनशीलतामा समेत प्रश्न उठाएकाले भोलि केही तलमाथि भए यसको जिम्मेवारी कसले लिने ?”

नेपाल पारवहन तथा गोदाम लिमिटेडका सूचना अधिकारी तुलसी पोखरेलले कार्गो वेयर हाउसमा जडान गरिएका मेसिन पुराना र जीर्ण अवस्थाका भएकाले बेलाबखत समस्या आउने गरेको भए पनि कार्गो जाँचपासको काम नै रोकिने अवस्था भने नरहेको दाबी गर्नुभयो ।

उहाँले भन्नुभयो, “स्क्यानर मेसिनमा देखिएको समस्या समाधान भएर प्रयोगमा आइसकेको छ । अहिले वेयर हाउसबाहिर रहेको तौल लिने मेसिनमा मात्रै समस्या रहेकाले नयाँ उपकरण जडानका लागि नेपाल नागरिक उड्डयन प्राधिकरणसँग भएको सम्भौता अनुसार नयाँ जडानको प्रक्रियासमेत चलिरहेको छ ।”