दोलखा, साउन २३ गते ।

दोलखाको गौरीशङ्कर गाउँपालिका–८, खारेमा निर्मित खारे माध्यमिक विद्यालयको दुईकोठे भवन गाईगोठमा परिणत भएको छ । बागमती प्रदेशको २५ लाख रुपियाँको लगानीमा बनेको विद्यालय खासै चासोमा नपर्दा प्रयोगविहीन भएर भवन गाईगोठ बनेको हो । स्थानीय समाजसेवी दिव्यध्वज कार्कीले विद्यालयलाई दान दिनुभएको जग्गामा लहडबाजीमै प्रदेशको लगानीमा बनेको सो भवन घेरबारसमेत नहुँदा स्थानीयले जबरजस्ती गाईगोठ बनाएका हुन् ।

विद्यालय व्यवस्थापन समितिका अध्यक्ष सानुराजा शेर्पाले भन्नुभयो, “गाउँलेले सार्वजनिक स्थानमा गाई राख्न पाइन्छ भन्दै बाँधेका छन् । गाई हटाउन अनुरोध गर्दा पनि नमानेका कारण समस्या भएको छ ।” उहाँले जग्गा र भवन संरक्षण गर्न घेरबार लगाउने तयारी भइरहेको जानकारी दिनुभयो । घेरबारपछि भवनलाई रङरोगन गरी शिक्षक तथा विद्यार्थीको आवास बनाउने योजना रहेको उहाँले बताउनुभयो ।