काठमाडौँ, ३ साउन :

खगोल विज्ञानसँग सम्बन्धित शिक्षाको प्रचारप्रसारका लागि दुई दिने शिक्षक प्रशिक्षण सुरु भएको छ ।नेपाल एष्ट्रोनोमिकल सोसाइटी र थाइल्याण्डको राष्ट्रिय खगोल अनुसन्धान संस्थाको संयुक्त आयोजनामा सुरु भएको कार्यक्रममा नेपाल र भारतका गरी ५० जनाको सहभागिता रहेको छ । कार्यक्रममा नेपालका ४६ र भारतका चार जना शिक्षकको सहभागिता रहेको सोसाइटीका अध्यक्ष सुरेश जानकारी दिनुभयो ।

प्रशिक्षणमा विज्ञान शिक्षा र विज्ञान कूटनीतिका बारेमा पनि सहभागीलाई ज्ञान दिइने छ । कार्यक्रमको उद्घाटन गर्नुहुँदै अष्ट्रियाका लागि पूर्व नेपाली राजदूत प्रकाशकुमार सुवेदीले विज्ञान कूटनीतिका बारेमा जसरी काम हुनुपर्ने त्यसरी हुन नसकेको बताउनुभयो । सरकारको नीति तथा कार्यक्रममा विज्ञान कूटनीतिका विषय समेटिए पनि सही रुपमा कार्यान्वयन हुन सकेको छैन ।

सरोकार भएका सरकारी एवं गैरसरकारी निकायले प्रविधिलाई नै विज्ञान भनेर बुझिदिँदा समस्या भएको उहाँको भनाइ छ । थाइल्याण्डको राष्ट्रिय खगोल अनुसन्धान संस्थाको अनुसन्धाता डा मतिपोन ताङमतिथामले शिक्षक समाजका अगुवा भएकाले उनीहरुलाई प्रशिक्षित गरिए यस विषयमा जागरण फैल्याउन सकिने भएकाले कार्यक्रमको आयोजना गरिएको जानकारी दिनुभयो ।

थाइल्याण्डमा काम गर्दाका अनुभव अन्य देशमा बाँडेर खगोल विज्ञानको क्षेत्रलाई समृद्ध बनाउने उहाँको भनाइ छ । थाइल्याण्डमा १६ वर्ष अघि संस्थाको स्थापना हुनुअघि जम्मा तीन जना खगोलशास्त्री रहेकामा अहिले ३०० भन्दा बढीलाई यसको ज्ञाता बनाउन सकिएको पनि अनुसन्धाता ताङमतिथामले सुनाउनुभयो । थाइल्याण्डमा अहिले यस क्षेत्रमा गहिरिएर अनुसन्धान गर्नेको सङ्ख्या ३३ पुगेको जानकारी पनि पनि उहाँले कार्यक्रममा दिनुभयो ।

प्रशिक्षणमा नेपालका सात र थाइल्याण्डका छ जना विज्ञले तालिम दिने जनाइएको छ । तालिमपछि प्रशिक्षार्थीले नेपाल र भारतका विद्यार्थीका साथै समुदायस्तरमा पनि यस विषयमा जनचेतना जगाउने भएका छन् ।