सुर्खेत, वैशाख ३ गते  ।

कर्णाली प्रदेश सभाका सदस्यहरूले सन्तुलित र समावेशी बजेट ल्याउन सुझाव दिनुभएको छ । शुक्रबार बसेको प्रदेश सभा बैठकमा सरकारले पेस गरेको आगामी आर्थिक वर्ष २०८२/८३ को विनियोजन विधेयक, २०८२ को सिद्धान्त र प्राथमिकतामाथिको छलफलमा भाग लिँदै प्रदेश सभा सदस्यहरूले सन्तुलित र समावेशी बजेट ल्याउन सरकारलाई सुझाव दिनुभएको हो ।

नेकपा (माओवादी केन्द्र) का संसदीय दलका नेता राजकुमार शर्माले आगामी बजेटमा प्रदेशको विकास र समृद्धिका लागि ठोस योजना समेट्नुपर्ने बताउनुभयो । उहाँले बजेटका सिद्धान्त र प्राथमिकता खासै नयाँ केही नआएकाले बजेटलाई प्रभावकारी बनाउन सुझाव दिनुभयो । उहाँले कृषि, पशु र वन उद्योगबाट कर्णालीको विकास गर्न सकिने भएकाले सरकारले यसतर्फ ध्यान दिनुपर्ने बताउनुभयो । यस्तै प्रदेश सभा सदस्य हिक्मत विष्टले सरकारलाई सन्तुलित र सर्वस्वीकार्य बजेट ल्याउन सुझाव दिनुभयो । उहाँले भन्नुभयो, “सुशासनलाई आत्मसात् गर्दै उत्पादन, उच्च प्रतिफल र परिणाममुखी बजेट ल्याउनु पर्छ । सरकारले यसतर्फ ध्यान देओस् ।”

प्रदेश सभा सदस्य दक्षिणा शाहीले आगामी आवको बजेट सन्तुलित, व्यावहारिक र गरिबी न्यूनीकरण गर्ने जनतामुखी बजेट बनाउन सरकारको ध्यानाकर्षण गराउनुभयो । उहाँले साधारण खर्च घटाएर पुँजीगत खर्च बढाउने नीति लिन पनि सरकारलाई सुझाव दिनुभयो । प्रदेश सभा सदस्य कल्याणी खड्काले सरकारलाई जनताको चाहना र सुहाउँदो बजेट ल्याउन सुझाव दिनुभयो । उहाँले विगत वर्षमा मुख्यमन्त्री र मन्त्रीहरूका जिल्लामा धेरै बजेट विनियोजन हुने प्रवृत्ति भएकाले आगामी बजेट सन्तुलित र समावेशी ढङ्गबाट ल्याउनुपर्नेमा जोड दिनुभयो ।